ເຂື່ອນໄຟຟ້ານໍ້າເທີນ 1 ເປີດການກັກ ເກັບນໍ້າ ເຂົ້າສູ່ຜະລິດກະແສໄຟຟ້າ

ຕາມຂ່າວສານ ຂປລ. ໃນວັນທີ 1 ເມສາ 2021 ໂຄງການໄຟຟ້າ ນໍ້າເທີນ 1 ໄດ້ເປີດການກັກເກັບນໍ້າ ເພື່ອຈະນຳໃຊ້ເຂົ້າໃນການຜະລິດກະແສໄຟຟ້າ ຂອງໂຄງການ ໃນເດືອນພຶດສະພາ 2022 ທີ່ຈະມາເຖິງນີ້,

ໂດຍມີ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ, ມີບັນດາ ລັດຖະມົນຕີ, ຮອງເຈົ້າແຂວງບໍລິຄຳໄຊ ພ້ອມດ້ວຍ ຄະນະບໍລິຫານບໍລິສັດ ໄຟຟ້າ ນໍ້າເທີນ 1 ຈໍາກັດ ແລະ ແຂກຖືກເຊີນ ເຂົ້າຮ່ວມ.

ທ່ານ ປຣີຊາ ກັນທະມູນ ປະທານກໍາມະການບໍລິຫານບໍລິສັດໄຟຟ້າ ນໍ້າເທີນ 1 ຈໍາກັດ ໄດ້ລາຍງານໃຫ້ຮູ້ວ່າ: ໂຄງການເຂື່ອນໄຟຟ້ານໍ້າເທີນ 1 ຕັ້ງຢູ່ແມ່ນໍ້າກະດິງ ບ້ານໂພນຈະເລີນ ເມືອງປາກກະດິງ ແຂວງ ບໍລິຄໍາໄຊ, ເລີ່ມລົງມືກໍ່ສ້າງໃນເດືອນ ມິຖຸນາ 2016, ລວມມູນຄ່າການກໍ່ສ້າງທັງໝົດແມ່ນ 1.335 ລ້ານໂດລາສະຫະລັດ,

ໃນນີ້ 70% ແມ່ນເງິນກູ້ຈາກກຸ່ມທະນາຄານໃນປະເທດໄທ ແລະ 30% ແມ່ນສົມທົບທຶນຈາກຜູ້ຮ່ວມຮຸ້ນ. ມາຮອດປັດຈຸບັນ ການກໍ່ສ້າງໜ້າວຽກໂດຍລວມ ສຳເລັດແລ້ວ 85%, ຄາດວ່າຈະເລີ່ມຜະລິດກະແສໄຟຟ້າ ແລະ ເປີດການ ຊື້-ຂາຍ ໄຟຟ້າ ຢ່າງເປັນທາງການ ໃນເດືອນພຶດສະພາ 2022, ໄລຍະສໍາປະທານ 27 ປີ, ນັບແຕ່ມື້ເລີ່ມຜະລິດໄຟຟ້າຢ່າງເປັນທາງການ.

ສຳລັບໂຄງສ້າງຂອງເຂື່ອນ, ການກໍ່ສ້າງອອກແບບຄອນກຣີດອັດແຮງ (RCC), ຍາວ 771 ແມັດ, ສູງ 177 ແມັດ, ເນື້ອທີ່ອ່າງເກັບນໍ້າ 9.360 ເຮັກຕາ, ສາມາດກັກເກັບນໍ້າໄດ້ປະມານ 3 ພັນລ້ານແມັດກ້ອນ, ມີກໍາລັງຕິດຕັ້ງ 650 MW, ສາມາດຜະລິດໄຟຟ້າໄດ້ 2.562 ກິກກາວັດໂມງຕໍ່ປີ (Gwh/year), ໃນນັ້ນຈະແບ່ງຂາຍໃຫ້ການໄຟຟ້າຝ່າຍຜະລິດ ແຫ່ງປະເທດໄທ (EGAT) 520 MW ແລະ ຂາຍໃຫ້ລັດວິສະຫະກິດ ໄຟຟ້າລາວ 130 MW.