ເຄື່ອນຍ້າຍອັດຖິ ທະຫານອາສາສະໝັກ ຊຽວຊານຫວຽດນາມ ກັບຄືນປະເທດ

ແຫລ່ງຂ່າວຈາກ ແຂວງບໍລິຄຳໄຊ ໃຫ້ຮູ້ວ່າ: ບັນດາການນໍາແຂວງ ນໍາໂດຍ ທ່ານ ສຸວັນນີ ໄຊຊະນະ ປະທານສະພາປະຊາຊົນແຂວງບໍລິຄໍາໄຊ ພ້ອມດ້ວຍ ຫົວໜ້າຄະນະປະຕິບັດງານພິເສດ ແຂວງບໍລິຄໍາໄຊ ສປປ ລາວ ແລະ ແຂວງ ຮ່າຕິ້ງ ສສ ຫວຽດນາມ ຕະຫລອດຮອດຫົວໜ້າພະແນກການ-ກົມກອງ ກ່ຽວຂ້ອງທັງສອງຝ່າຍ ໄດ້ພ້ອມກັນເຂົ້າຮ່ວມ ໄວ້ອາໄລ ອັດຖິ ທະຫານອາສາສະໝັກ ຊ່ຽວຊານຫວຽດນາມ

ທີເສຍສະຫລະຊີວິດໃນປາງສົງຄາມຢູ່ລາວ ທີ່ຄະນະປະຕິບັດງານພິເສດ ສອງຝ່າຍຂຸດຄົ້ນໄດ້ ຈໍານວນ 11 ອັດຖິ ໃນໄລຍະລະດູແລ້ງ ປະຈໍາປີ 2021-2022 ຢູ່ ສປປ ລາວ ເປັນຄັ້ງສຸດທ້າຍ ໃນວັນທີ 16 ພຶດສະພາ 2022 ກ່ອນທີ່ຈະເຄືອນຍ້າຍອັດຖິ ດັ່ງກ່າວ ກັບຄືນປະເທດ.

ພິທີເຄື່ອນຍ້າຍ ອັດຖິ ທະຫານອາສາສະໝັກ ຊ່ຽວຊານຫວຽດນາມ ຄັ້ງນີ້, ຕ່າງໜ້າໃຫ້ກັບການນໍາຂອງແຂວງ ຮ່ວມນໍາຂະບວນເຄຶ່ອນຍ້າຍ ໂດຍ ທ່ານ ຄໍາແຫວນ ປັນຍານຸງວົງ ຮອງຫົວໜ້າຄະນະປະຕິບັດງານພິເສດ ແຂວງບໍລິຄໍາໄຊ ພ້ອມດ້ວຍຄະນະ. ພ້ອມນີ້, ຍັງມີບັນດາການນໍາພັກ-ລັດ ນັກຮຽນ, ນັກສຶກສາ ຫລອດຮອດພໍ່ແມ່ປະຊາຊົນບັນດາເຜົ່າຊາວລາວ ແລະ ຊາວຫວຽດນາມເຂົ້າຮ່ວມ ຢືນຕ້ອນຮັບຂະບວນ ດັ່ງກ່າວ ຢູ່ຕາມເສັ້ນທາງສາຍຕ່າງໆ ທີ່ຂະບວນລົດໄດ້ແລ່ນຜ່ານ.

ທັງນີ້, ກໍເພື່ອເປັນການສະແດງຄວາມຮູ້ບຸນຄຸນ, ຄຸນງາມຄວາມດີ ຄັ້ງສຸດທ້າຍຕໍ່ ອັດຖິ ຂອງທະຫານອາສາສະໝັກ ແລະ ຊ່ຽວຊານຫວຽດນາມ ທີ່ໄດ້ເສຍສະຫລະເລືອດເນື້ອ ໃນການຕໍ່ສູ້ໃນປາງສົງຄາມຢູ່ລາວ ໃຫ້ກັບຄືນປະເທດຢ່າງສົມກຽດ

ເພື່ອໃຫ້ຄະນະປະຕິບັດງານພິເສດແຂວງ ຮ່າຕິ້ງ ສສ ຫວຽດນາມ ໄດ້ທໍາພິທີທາງສາສະໜາ ແລ້ວນໍາເອົາອັດຖິ ເຂົ້າມ້ຽນຢູ່ທີ່ສຸສານ ປະຈໍາແຂວງ ເພື່ອໃຫ້ ພໍ່ແມ່ປະຊາຊົນ ທັງສອງຊາດ ໄດ້ມີຄວາມເອກອ້າງທະນົງໃຈ ສະແດງຄວາມຮູ້ບຸນຄຸນ ຄຸນງາມຄວາມດີ

ແລະ ວິລະກໍາອັນລໍາເລີດ ຂອງທະຫານອາສາສະໝັກ ແລະ ຊ່ຽວຊານຫວຽດນາມ ໃຫ້ຄົນຮຸ່ນໃໝ່ໄດ້ຮັບຮູ້ ແລະ ຕໍ່ເພີ່ມພູນຄູນສ້າງ ສາຍພົວພັນມິດຕະພາບ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ-ສອງລັດ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ທີ່ມີມາແຕ່ດຶກດໍາບັນ ໃຫ້ຍືນຍົງຄົງຕົວ ຢູ່ຄູ່ກັບປະຊາຊົນສອງຊາດຕະຫລອດໄປ.