ຕາມການໃຫ້ຂໍ້ມູນຂອງທ່ານ ນາງ ກິນນະລີ ທຳມະວົງ ຮອງຫົວໜ້າດ່ານພາສີສາກົນຂົວມິດຕະພາບ 3 ຄຳມ່ວນ-ນະຄອນພະນົມ ໃນວັນທີ 11 ພຶດສະພາ 2022 ໃຫ້ຮູ້ວ່າ: ປີ 2022 ດ່ານພາສີສາກົນຂົວມິດຕະພາບ 3 ໄດ້ຮັບຕົວເລກສູ້ຊົນເກັບລາຍຮັບຈຳນວນທັງໝົດ 412,7 ຕື້ກີບ ຜ່ານການຈັດຕັ້ງປະຕິບັດ ມາຮອດວັນທີ 10 ພຶດສະພາ ສາມາດຈັດເກັບລາຍຮັບໄດ້ທັງໝົດ 114,2 ຕື້ກີບ ເທົ່າກັບ 27,67% ຂອງແຜນການປີ.
ໃນນີ້ລາຍຮັບ ສ່ວນຫຼາຍແມ່ນໄດ້ຈາກໝວດສິນຄ້າປະເພດນໍ້າມັນເຊື້ອໄຟ, ການນຳເຂົ້າພາຫະນະ, ເຄື່ອງອຸປະໂພກ-ບໍລິໂພກ, ສິນຄ້າຂາອອກ ແລະ ຄ່າທຳນຽມຕ່າງໆ ເຊິ່ງຄາດຄະເນວ່າໃນ 6 ເດືອນຕົ້ນປີ ການເກັບລາຍຮັບຈະສາມາດບັນລຸໄດ້ 185 ຕື້ກີບ ຫຼື ເທົ່າກັບ 45% ຂອງແຜນການປີ. ເຖິງຢ່າງໃດກໍ່ຕາມ ເພື່ອເຮັດໃຫ້ລາຍຮັບຕາມຕົວເລກຄາດຄະເນໄວ້ ບັນລຸ ແລະ ລື່ນຄາດໝາຍ ດ່ານພາສີຂົວມິດຕະພາບ 3 ໄດ້ກຳນົດມາດຕະການຈຳນວນໜຶ່ງ ເປັນວຽກງານຈຸດສຸມຄື:
![](https://kkklao.com/wp-content/uploads/2022/05/1-15.jpg)
ສືບຕໍ່ເອົາໃຈໃສ່ທາງດ້ານການເມືອງ-ແນວຄິດ ໃຫ້ແກ່ພະນັກງານຢ່າງເປັນປົກກະຕິ ຖືເອົາວຽກງານການເກັບລາຍຮັບ ເປັນໜ້າທີ່ການເມືອງຕົ້ນຕໍ ຕິດພັນກັບການເຄື່ອນໄຫວວຽກງານອື່ນໆ, ຍົກສູງຄວາມຮັບຜິດຊອບໃນການປະຕິບັດ ໜ້າທີ່ໃຫ້ເຂັ້ມງວດ, ເອົາໃຈໃສ່ຕິດຕາມ, ກວດກາ ແລະ ຄຸ້ມຄອງ ການນຳເຂົ້າ-ສົ່ງອອກສິນຄ້າໃນແຕ່ລະວັນ ຢ່າງເຂັ້ມງວດ, ເກັບພັນທະໃຫ້ຖືກຕ້ອງ ແລະ ຄົບຖ້ວນ, ປັບປຸງແບບແຜນວິທີເຮັດວຽກໃຫ້ກະທັດຮັດ,
ສອດຄ່ອງຕາມລະບຽບກົດໝາຍ, ຫຼຸດຜ່ອນຂັ້ນຕອນຕ່າງໆທີ່ບໍ່ຈຳເປັນ ເພື່ອສ້າງເງື່ອນໄຂອຳນວຍຄວາມສະດວກ ໃຫ້ແກ່ການນຳເຂົ້າ-ສົ່ງອອກສິນຄ້າ, ສຸມໃສ່ການຄຸ້ມຄອງຈັດເກັບລາຍຮັບ, ຂຸດຄົ້ນທຸກທ່າແຮງບົ່ມຊ້ອນ, ເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼໃນການເກັບລາຍຮັບ, ເພີ່ມທະວີການປະສານສົມທົບກັບ ຂະແໜງການທີ່ກ່ຽວຂ້ອງພາຍໃນດ່ານ ແລະ ນອກດ່ານ ເພື່ອສ້າງສິ່ງອຳນວຍຄວາມສະດວກໃນການຈັດຕັ້ງວຽກງານ ວິຊາສະເພາະໃຫ້ເຂັ້ມແຂງ.
ຂ່າວ: Media Laos
Discussion about this post