ຕາມຂ່າວວຽງຈັນທາຍໃຫ້ຮູ້ວ່າ ປະຊາຊົນເມືອງເຊໂປນ ແຂວງສະຫວັນນະເຂດ ທີ່ໄດ້ຮັບຜົນກະທົບຈາກນໍ້າຖ້ວມຕ້ອງການຄວາມຊ່ວຍ ເຫຼືອ ຈາກສັງຄົມຢ່າງຮີບດ່ວນກ່ຽວກັບເຂົ້າສານ ອາຫານແຫ້ງ, ນໍ້າດື່ມ ແລະ ເຄື່ອງນຸ່ງຫົ່ມ ເພື່ອປະຄອງຊີວິດໃນການດໍາລົງຊີວິດໃນໄລຍະຢູ່ສູນພັກພິງຊົ່ວຄາວໃນໄລຍະທີ່ຖືກນໍ້າຖ້ວມ.
ເຈົ້າເມືອງເຊໂປນ ທ່ານວົງສະຫວັນ ວຽງມະນີ ໄດ້ກ່າວຕໍ່ທີມງານວຽງຈັນທາຍກ່ຽວກັບ ສະພາບນໍ້າຖ້ວມຢູ່ເມືອງເຊໂປນມື້ເຊົ້ານີ້ວັນທີ 19 ຕຸລາ 2020 ວ່າ: ນັບແຕ່ວັນທີ 6 ຕຸລາ ມາຮອດປັດຈຸບັນນໍ້າໄດ້ຖ້ວມບ້ານຕ່າງໆພາຍໃນເມືອງເປັນຮອບທີ 4 ແລ້ວ ຍ້ອນມີຝົນຕົກຕິດຕໍ່ກັນຫຼາຍວັນ ແລະ ເລີ່ມຖ້ວມໜັກແມ່ນນັບແຕ່ວັນທີ 16 ຕຸລາ ເປັນຕົ້ນມາ ຊຶ່ງປະຊາຊົນຈໍານວນ 80 ບ້ານພາຍໃນເມືອງບໍ່ມີໄຟຟ້າໃຊ້, ເສັ້ນທາງຄົມມະນາຄົມຖືກຕັດຂາດບໍ່ສາມາດທຽວໄດ້.
ນໍ້າຖ້ວມຢູ່ເມືອງເຊໂປນນີ້ບໍ່ສະເພາະແຕ່ບັນດາບ້ານທີ່ຢູ່ແຄມຫ້ວຍນໍ້າລໍາເຊເທົ່ານັ້ນ ແຕ່ນໍ້າໄດ້ຖ້ວມຢູ່ທຸກໆບ້ານ, ບາງບ່ອນນໍ້າໄດ້ຖ້ວມສູງຈົນ ເຮັດໃຫ້ເຮືອນ 2 ຊັ້ນບໍ່ເຫັນຮອດຫຼັງຄາກໍ່ມີ. ຄວາມຕ້ອງການຮີບດ່ວນໃນການຊ່ວຍເຫຼືອຈາກສັງຄົມກໍ່ຄືເຄື່ອງອຸປະໂພກ, ບໍລິໂພກ ແລະ ເຮືອໃຫ່ຍເພາະເຮືອນ້ອຍຍັງບໍ່ສາມາດເຂົ້າເຖິງບ້ານປະຊາຊົນໄດ້ເພາະນໍ້າຍັງໄຫຼແຮງ.
ທ່ານວົງສະຫວັນໄດ້ກ່າວຕື່ມວ່າ: ເມືອງເຊໂປນຖືວ່າໄດ້ຮັບຜົນກະທົບໜັກກວ່າເມືອງອື່ນໆພາຍໃນແຂວງສະຫວັນນະເຂດຊຶ່ງມີ 7-8 ເມືອງທີ່ຖືກນໍ້າຖ້ວມ ແລະ ຖືວ່າໜັກໜ່ວງໃນຮອບ 42 ປີ.
ຈາກການເກັບກໍາຂໍ້ມູນເບື້ອງຕົ້ນກ່ຽວກັບຜົນເສຍຫາຍພົບວ່າ ມີເຮືອນຖືກນໍ້າຊຸພັງ, ເປ່ເພເປັນຈໍານວນຫຼາຍ, ເນື້ອທີ່ນາທີ່ກໍາລັງ ຈະເກັບກ່ຽວຜົນຜະລິດຫຼາຍກວ່າ 3.000 ເຮັກຕາຈາກ 4.200 ເຮັກຕາກໍຖືກນໍ້າຖ້ວມ. ນອກນັ້ນຍັງມີ ເສັ້ນທາງ, ໜອງປາ, ຊົນລະປະທານ ເສົາໄຟຟ້າຫັກໂຄ່ນຈໍານວນໜຶ່ງ ແລະ ອື່ນໆ ແຕ່ບໍ່ມີຜູ້ເສຍຊີວິດ.
ມາຮອດຕອນເຊົ້າມື້ນີ້, ລະດັບນໍ້າໄດ້ຫຼຸດລົງແລ້ວປະມານ 2 ແມັດແຕ່ກໍຍັງຢູ່ໃນເຂດອັນຕະລາຍຢູ່. ສະເພາະປະຊາຊົນທີ່ເຮືອນຖືກນໍ້າຖ້ວມທາງເມືອງໄດ້ຍົກຍ້າຍໄປຢູ່ສູນພັກພິງຊົ່ວຄາວທີ່ເປັນບ່ອນສູງ ຢູ່ຕາມໂຮງຮຽນ ແລະ ຕາມພູ.
Discussion about this post