ເພື່ອເປັນການປັບປຸງພື້ນຖານໂຄງລ່າງຂອງບ້ານ ແລະ ແຜນພັດທະນາເສດຖະກິດ-ສັງຄົມຂອງເມືອງເຊບັ້ງໄຟແຂວງຄໍາມ່ວນ ພ້ອມທັງເຮັດໃຫ້ການໄປມາຫາສູ່ພາຍໃນບ້ານມີຄວາມສະດວກສະບາຍຂຶ້ນຕື່ມ ດັ່ງນັ້ນໃນວັນທີ 29 ມີນາ 2022 ຜ່ານມານີ້ ການຈັດຕັ້ງບ້ານທຸກພາກສ່ວນ ພ້ອມດ້ວຍພໍ່-ແມ່ປະຊາຊົນພາຍໃນບ້ານສັງ

ໄດ້ ພ້ອມໃຈກັນສ້າງຂະບວນການປູເບຕົງທາງເຂົ້າວັດ ເຊິ່ງນຳໂດຍ ທ່ານ ວຽງໄຊ ອິນທິລາດ ນາຍບ້ານໆສັງ ພ້ອມດ້ວຍການຈັດຕັ້ງທຸກພາກສ່ວນ ແລະ ພໍ່-ແມ່ປະຊາຊົນພາຍໃນບ້ານ ເສັ້ນທາງດັ່ງກ່າວມີຄວາມຍາວ 50 ແມັດ, ກວ້າງ 04 ແມັດ ລວມມູນຄ່າ 12.000.000 ກວ່າກີບ ນໍາໃຊ້ປູນຈໍານວນ 8 ໂຕ່ນ, ແຮ່ 03 ລົດ, ຊາຍ 03 ລົດ

ໂດຍໃຊ້ແຮງງານຂອງປະຊາຊົນພາຍໃນບ້ານ ການກໍ່ສ້າງແມ່ນເລີ່ມໃນວັນທີ 29 ມີນາ 2022 ເປັນຕົ້ນມາ, ສໍາລັບວັດຖຸອຸປະກອນນໍາໃຊ້ເຂົ້າໃນການກໍ່ສ້າງ ແມ່ນໄດ້ລະດົມນໍາພໍ່ແມ່ປະຊາຊົນພາຍໃນບ້ານ, ນັກທຸລະກິດ ແລະ ບໍລິສັດຫ້າງຮ້ານ.

ໃນວັນດຽວກັນ ການນຳເມືອງ ເຊິ່ງນຳໂດຍ ທ່ານ ທອງໄຊ ມັງໜໍ່ເມກ ເຈົ້າເມືອງໆເຊບັ້ງໄຟ, ທ່ານ ບຸນທັນ ພິມພົມມາ ຫົວໜ້າຫ້ອງການໂຍທາທິການ ແລະ ຂົນສົ່ງເມືອງ ພ້ອມດ້ວຍຄະນະ ໄດ້ລົງຕິດຕາມການກໍ່ສ້າງເສັ້ນທາງດັ່ງກ່າວ ພ້ອມທັງມອບປູນຈໍານວນ 1 ໂຕ່ນ ມູນຄ່າ 600.000 ກີບ ເພື່ອປະກອບສ່ວນເຂົ້າໃນການກໍ່ສ້າງ ສຳລັບແຜນຕໍ່ໜ້າ ທາງບ້ານແມ່ນຈະໄດ້ສືບຕໍ່ສ້າງຄວາມຍາວໃຫ້ໄດ້ 200 ແມັດ.