ຊາວນະຄອນຫລວງວຽງຈັນ ກຽມທ່ຽວຊົມງານເທສະການຫຸ່ນເຟືອງທົ່ງນາແຊງບ້ານນາ ເຊີ່ງຈະຈັດຂຶ້ນຢູ່ບ້ານໜອງບົວທອງເໜືອ, ເມືອງຈັນທະບູລີ, ນະຄອນຫລວງວຽງຈັນ ໃນລະຫວ່າງວັນທີ 21-29 ມີນາ 2022 ໂດຍຈະມີຫລາຍກິດຈະກໍາເພື່ອທ່ຽວຊົມ.
![](https://kkklao.com/wp-content/uploads/2022/03/Screenshot_20220322-112232-1024x777.jpg)
ທ່ານ ນາງ ວົງຈັນ ບົວແພງ ຮອງຜູ້ຈັດການໂຮງແຮມລາວເທວ, ທັງເປັນຜູ້ຮັບຜິດຊອບການຈັດງານຄັ້ງນີ້ ໃຫ້ສໍາພາດວ່າ: ຈຸດປະສົງຂອງການຈັດງານໃນຄັ້ງນີ້ ເພື່ອເປັນການສົ່ງເສີມການທ່ອງທ່ຽວພາຍໃນນະຄອນຫລວງວຽງຈັນ ຫລື ລາວທ່ຽວລາວໃຫ້ກັບມາມີບັນຍາກາດຄຶກຄື້ນອີກຄັ້ງໜຶ່ງ, ນອກຈາກນີ້ ຍັງເປັນການສົ່ງເສີມທຸລະກິດຊຸມຊົນໃຫ້ມີບ່ອນຊື້-ບ່ອນຂາຍຂອງປະຊາຊົນພາຍໃນເມືອງຈັນທະບູລີ ກໍຄື ນະຄອນຫລວງວຽງຈັນ.
![](https://kkklao.com/wp-content/uploads/2022/03/Screenshot_20220322-112207-1024x698.jpg)
ພາຍໃນງານຄັ້ງນີ້ ຈະຈັດໃຫ້ມີຫລາຍກິດຈະກໍາ ເຊັ່ນ: ການຖ່າຍຮູບກັບຫຸ່ນເຟືອງທີ່ເປັນສັດຫລາຍປະເພດ ຄື: ຄວາຍ, ຊ້າງ, ສິງ, ເສືອ ແລະ ລິງການຂາຍສິນຄ້າຕ່າງໆ ຂອງປະຊາຊົນ, ລວມທັງຜູ້ປະກອບການທີ່ນໍາມາວາງສະແດງຂາຍພາຍໃນງານ.
![](https://kkklao.com/wp-content/uploads/2022/03/Screenshot_20220322-112217-1024x590.jpg)
ທ່ານໃຫ້ຮູ້ຕື່ມວ່າ: ການຈັດງານຄັ້ງນີ້ ຈະປະຕິບັດຄຽງຄູ່ກັບມາດຕະການປ້ອງກັນພະຍາດໂຄວິດ-19 ຢ່າງເຂັ້ມງວດ ແລະ ຖືເປັນຄັ້ງທໍາອິດທີ່ຈັດງານເທສະການຫຸ່ນເຟືອງທົ່ງນາແຊງບ້ານນາຢູ່ນະຄອນຫລວງວຽງຈັນ, ຖ້າຫາກໄດ້ຮັບຜົນດີຈະສືບຕໍ່ຈັດຂຶ້ນທຸກໆປີ ເພື່ອເປັນສ່ວນໜຶ່ງໃນການຊຸກຍູ້ສົ່ງເສີມການທ່ອງທ່ຽວພາຍໃນເມືອງຈັນທະບູລີ ກໍຄື ນະ ຄອນຫລວງວຽງຈັນ ໃຫ້ມີບັນຍາກາດຄຶກຄື້ນມ່ວນຊື່ນ. ທັງເປັນອີກສະຖານທີ່ໜຶ່ງເພື່ອຊື້-ຂາຍສິນຄ້າຂອງປະຊາຊົນຕື່ມອີກ.
![](https://kkklao.com/wp-content/uploads/2022/03/Screenshot_20220322-112223-1024x774.jpg)
Discussion about this post