ວັນທີ 25-26 ພະຈິກ 2021 ກອງບັນຊາການ ປກສ ເມືອງສັງທອງ ນະຄອນຫຼວງວຽງຈັນ ໄດ້ສົມທົບກັບທະຫານ ແລະ ຄະນະສະເພາະກິດ ເມືອງສັງທອງ ລົງໂຄສະນາ ແລະ ປິດບ້ານສຳພັນນາ ພ້ອມທັງກຳນົດເປັນເຂດບ້ານພື້ນທີ່ສີແດງ ໃນຮອບໃໝ່ ພາຍຫຼັງກວດພົບຜູ້ຕິດເຊື້ອໃໝ່ 14 ຄົນ ຍິງ 9 ຄົນ.
ພັທ ສີວິໄລ ພູມນະໄຊ ຫົວໜ້າກອງບັນຊາການ ປກສ ເມືອງສັງທອງ ໃຫ້ຮູ້ວ່າ: ບ້ານສຳພັນນາ ເຄີຍເປັນເຂດບ້ານພື້ນທີ່ສິີແດງໃນເດືອນມິຖຸນາ ປີ 2021 ຜ່ານມາ ຍ້ອນມີປະຊາຊົນພາຍໃນບ້ານ ຕິດເຊື້ອພະຍາດໂຄວິດ-19 ຄົນ ຍິງ 6 ຄົນ ຈໍານວນດັ່ງກ່າວໄດ້ຮັບການປິ່ນປົວຫາຍດີເປັນປົກກະຕິແລ້ວ. ຕົກມາຮອດວັນທີ 16 -26 ພະຈິກ 2021 ບ້ານສຳພັນນາເກີດມີການແຜ່ລະບາດພະຍາດຮອບໃໝ່ອີກ 14 ຄົນ ຍິງ 9 ຄົນ. ຄະນະສະເພາະກິດເມືອງສັງທອງ ຈິ່ງໄດ້ລົງຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດຂອງເຊື້ອພະຍາດໂຄວິດ -19. ດ້ວຍວິທີລົງໂຄສະນາເຜີຍແຜ່ ເຮັດໃຫ້ປະຊາຊົນໄດ້ຮັບຮູ້ເຂົ້າໃຈເຖິງໄພອັນຕະລາຍຂອງເຊື້ອພະຍາດໂຄວິດ -19 ແລະ ຮູ້ຈັກວິທີການປ້ອງກັນຕົນເອງ ແລະ ຄອບຄົວ, ຍົກສູງສະຕິປ້ອງກັນຕົນເອງ ພ້ອມທັງປິດທາງຮ່ອມ ທາງຊອຍ ຕາມຈຸດທີ່ມີຄອບຄົວຜູ້ຕິດເຊື້ອ ແລະ ໂຈະຊົ່ວຄາວການອອກຫາປາຕາມລຳແມ່ນ້ຳຂອງ; ເຈົ້າເຮືອໃຫ້ປະຕິບັດໂມງເວລາຢ່າງເຂັ້ມງວດ, ເດັດຂາດຕໍ່ຜູ້ລະເມີດ. ເພື່ອປ້ອງກັນບໍ່ໃຫ້ມີການລະບາດຂອງເຊື້ອພະຍາດດັ່ງກ່າວອອກສູ່ວົງກວ້າງ.
Discussion about this post