ທາງລົດໄຟ ລາວ-ຈີນ ສຳເລັດຕາມເປົ້າໝາຍ ກຽມພ້ອມເປີດນຳໃຊ້ເປັນທາງການ 3 ທັນວາ ນີ້

ໂຄງການກໍ່ສ້າງທາງລົດໄຟ ລາວ-ຈີນ ມາຮອດປັດຈຸບັນ ແມ່ນສຳເລັດ 100% ແລ້ວ ພາຍຫລັງໃຊ້ເວລາ 5 ປີ ໃນການກໍ່ສ້າງ, ໂດຍໄດ້ວາງສີລາລຶກ ໃນວັນທີ 2 ທັນວາ 2015 ແລະ ໄດ້ເລີ່ມລົງມືກໍ່ສ້າງຕົວຈິງ ໃນວັນທີ 25 ທັນວາ 2016 ເປັນຕົ້ນມາ, ມາຮອດກາງ ປີ 2021 ໂຄງການກໍ່ສ້າງທາງລົດໄຟ ລາວ-ຈີນ ໄດ້ສຳເລັດ 100% ແລະ ຈະເປີດນໍາໃຊ້ຢ່າງເປັນທາງການ ໃນວັນທີ 3 ທັນວາ 2021 ທີ່ຈະມາເຖິງນີ້.

ໂຄງການລົດໄຟ ລາວ-ຈີນ ແມ່ນໄດ້ອອກແບບເປັນລົດໄຟມາດຕະຖານຊັ້ນ I ແລະ ປະເພດເສັ້ນທາງດຽວ, ການກຳນົດຄວາມເນີນອອກແບບສູງສຸດຂອງໂຄງການແມ່ນ 1,2% ຢູ່ທົ່ງພຽງ ແລະ 2,4% ຢູ່ເຂດພູສູງ, ແຕ່ຊ່ວງບໍ່ເຕັ້ນ-ວັງວຽງ ເປັນເຂດພູຜາຊັນ ແລະ ຊ່ວງ ວັງວຽງ-ນະຄອນຫລວງວຽງຈັນ ເປັນເຂດທົ່ງພຽງ. ສ່ວນການກຳນົດຄວາມໄວ ສຳລັບການຂົນສົ່ງໂດຍສານ ໃນເຂດພູດອຍ ແມ່ນໄດ້ກຳນົດຄວາມໄວ 160 ກມ/ຊມ, ສຳລັບເຂດທົ່ງພຽງ ແຕ່ວັງວຽງ-ນະຄອນຫລວງວຽງຈັນ ແມ່ນໄດ້ກຳນົດຄວາມໄວສຳຮອງ 200 ກມ/ຊມ ໃນອະນາຄົດ; ການຂົນສົ່ງສິນຄ້າ ແມ່ນໄດ້ກຳນົດຄວາມໄວ 120 ກມ/ຊມ; ລະບົບການຂັບເຄື່ອນຂະບວນລົດໄຟ ແມ່ນນຳໃຊ້ພະລັງໄຟຟ້າ ແລະ ມີຄວາມສາມາດຮອງຮັບນ້ຳໜັກການຂົນສົ່ງເຖິງ 3.000 ໂຕນ ໃນໄລຍະເລີ່ມຕົ້ນ ແລະ ສາມາດເພີ່ມຂຶ້ນເປັນ 4.000 ໂຕນໃນໄລຍະຍາວ.

ໂຄງການກໍ່ສ້າງທາງລົດໄຟ ລາວ-ຈີນ ມີຄວາມຍາວທັງໝົດ 426,5 ກມ; ໃນນັ້ນ, ນັບແຕ່ບໍ່ເຕັນ-ນະຄອນຫລວງວຽງຈັນ ມີຄວາມຍາວ 417 ກມ (ສະຖານີໂດຍສານ ຢູ່ບ້ານໂຄກສະອາດ ເມືອງໄຊທານີ), ຈາກສະຖານນີໂດຍສານວຽງຈັນເໜືອ ຫາ ສະຖານີລົດໄຟວຽງຈັນໃຕ້ ທ່ານາແລ້ງ 9 ກມ.

ການກໍ່ສ້າງເສັ້ນທາງລົດໄຟ, ໄດ້ກໍ່ສ້າງຂົວ ທັງໝົດ 170 ແຫ່ງ, ມີຄວາມຍາວທັງໝົດ 69,20 ກມ, ລວມທັງຂົວຂ້າມແມ່ນໍ້າຂອງ ຢູ່ແຂວງຫລວງພະບາງ 2 ແຫ່ງ, ກໍ່ສ້າງອຸມົງ 75 ແຫ່ງ ມີຄວາມຍາວທັງໝົດ 197,6 ກມ, ໃນນີ້ ອຸມົງທີ່ມີຍາວຫລາຍກວ່າ 7 ກມ, ມີ 7 ແຫ່ງ ແລະ ອຸມົງທີ່ມີຄວາມຍາວກວ່າໝູ່ ແມ່ນ 9,50 ກມ.

ສຳລັບການຄຸ້ມຄອງການບໍລິການຂົນສົ່ງທາງລົດໄຟ ນັບແຕ່ດ່ານບໍ່ເຕັນ ຮອດສະຖານີນະ ຄອນຫລວງວຽງຈັນ ມີສະຖານີລົດໄຟ ທັງໝົດ 33 ສະຖານີ, ໃນໄລຍະທຳອິດ ຈະເປີດນຳໃຊ້ 21 ສະຖານີ, ອີກ 12 ສະຖານີ ຈະເປີດນໍາໃຊ້ໄລຍະຕໍ່ໄປ. ໃນຈຳນວນ 33 ສະຖານີນີ້, ມີສະຖານີຂົນສົ່ງໂດຍສານ ແລະ ສິນຄ້າ ລວມຢູ່ນໍາກັນ 11 ສະຖານີ ຄື: ສະຖານີບໍ່ເຕັນ, ນາເຕີຍ, ນາໝໍ້, ເມືອງໄຊ, ເມືອງງາ, ຫລວງພະບາງ, ກາສີ, ວັງວຽງ, ໂພນໂຮງ, ນະຄອນຫລວງວຽງຈັນ ແລະ ສະຖານີຂົ່ນສົ່ງສິນຄ້າສະເພາະ ມີ 1 ແຫ່ງ ຢູ່ນະຄອນຫລວງວຽງຈັນໃຕ້; ມີ ຈຸດສະຫລັບລາງ ແລະ ຈຸດຫລີກ ທັງໝົດ 284 ແຫ່ງ. ການຈັດແຜນແລ່ນລົດ ແລະ ການຄຸ້ມຄອງການແລ່ນລົດໄຟ ສຳລັບການບໍລິການຂົນສົ່ງໂດຍສານ ແມ່ນໃຊ້ເວລາກາງເວັນ, ການບໍລິການສິນຄ້າແມ່ນເວລາກາງຄືນ. ສ່ວນຈຳນວນ ຂະບວນລົດໄຟ ໃນເບື້ອງຕົ້ນ ມີ 18 ຂະບວນ, ໃນນັ້ນ ຂະບວນຂົນສົ່ງໂດຍສານ ມີ 4 ຂະບວນ ແລະ ຂົນສົ່ງສິນຄ້າມີ 14 ຂະບວນ.

ການເປີດນຳໃຊ້ສະຖານີລົດໄຟ ໃນໄລຍະຕົ້ນ ຈະເປີດນຳໃຊ້ 21 ສະຖານີ ເຊິ່ງສາມາດແລ່ນໄດ້ 23 ຖ້ຽວຕໍ່ວັນ, ຖ້າຫາກວ່າໄດ້ເປີດນຳໃຊ້ທັງ 33 ສະຖານີ ສາມາດເພີ່ມຖ້ຽວໄດ້ ເຖິງ 39 ຖ້ຽວຕໍ່ວັນ.

ຂ່າວ-ພາບ: fb ປະເທດລາວ