ສຶກສາອົບຮົມເປົ້າໝາຍ 7 ຄົນ ພຶດຕິກໍາ ການເຄື່ອນໄຫວພົວພັນກັບສິ່ງເສບຕິດ

ວັນທີ 11 ພະຈິກ 2021 ເວລາ 14:00 ໂມງ ໜ່ວຍງານສະກັດກັ້ນ ແລະ ຕ້ານຢາເສບຕິດ ພະແນກຕໍາຫຼວດ ປກສ ເມືອງສີສັດຕະນາກ ໄດ້ສົມທົບກັບ ປກສ ກຸ່ມທາດຂາວ, ການຈັດຕັ້ງບ້ານພະໄຊ ໄດ້ເຊີນເປົ້າໝາຍ ແລະ ຜູ້ປົກຄອງ ຈໍານວນ 7 ຄົນ, ຍິງ 1 ຄົນ ມາສຶກສາອົບຮົມ ຍ້ອນມີພຶດຕິກໍາ ການເຄື່ອນໄຫວພົວພັນກັບສິ່ງເສບຕິດ.

ການສຶກສາອົບຮົມຄັ້ງນີ້ ເຈົ້າໜ້າທີ່ ໄດ້ຍົກໃຫ້ເຫັນຜົນຮ້າຍ ແລະ ໄພອັນຕະລາຍຂອງຢາເສບຕິດ ຕໍ່ຊີວິດຊັບສິນ, ຕໍ່ສັງຄົມ ແລະ ເປັນການກະທໍາທີ່ຜິດລະເມີດລະບຽບກົດໝາຍ ໃຫ້ເຂົາເຈົ້າຮັບຮູ້ ແລະ ຮູ້ສຶກກິນແໜງແຄງໃຈ ຕໍ່ການກະທໍາຜິດ ບໍ່ໃຫ້ໄປພົວພັນກັບຢາເສບຕິດອີກ ການສຶກສາອົບຮົມ ແມ່ນອີງໃສ່ຄໍາສັ່ງເລກທີ 02/ກມສພ ລົງວັນທີ 26 ກໍລະກົດ 2021 ວ່າດ້ວຍການເພີ່ມທະວີການນໍາພາຊີ້ນໍາ ຂອງຄະນະແຕ່ລະຂັ້ນ ຕໍ່ການສະກັດກັ້ນ ແລະ ແກ້ໄຂບັນຫາຢາເສບຕິດ.

ກອງບັນຊາການ ປກສ ນວ ຮຽກຮ້ອງມາຍັງພໍ່ແມ່, ຜູ້ປົກຄອງ ເອົາໃຈໃສ່ຕໍ່ລູກຫຼານ ທີ່ຢູ່ໃນຄວາມຮັບຜິດຊອບຂອງຕົນ ໃຫ້ເອົາໃຈໃສ່ຕິດຕາມພຶດຕິດກໍາ, ການເຄື່ອນໄຫວໄປ-ມາ ພົວພັນກັບໝູ່ຄູ່ສັງຄົມ ຖ້າເຫັນລູກຫຼານຂອງຕົນ ມີການປ່ຽນແປງໄປໃນທາງທີ່ບໍ່ຖືກຕ້ອງ ໃຫ້ຈິງໃຈລາຍງານນຳອຳນາດການປົກຄອງບ້ານ ແລະ ເຈົ້າໜ້າທີ່ ເພື່ອກອບກູ້ ແລະ ປັບປ່ຽນ ແນວຄິດ ການກະທໍາໃຫ້ຖືກຕ້ອງ ຕາມລະບຽບດໍາລົງຊີວິດຂອງສັງຄົມ,

ນອກຈາກນັ້ນ ເພື່ອເປັນການປ້ອງກັນ ແລະ ຢັບຢັ້ງການກະທໍາທີ່ຜິດກົດໝາຍ ກັບກາຍເຂົ້າມາສູ່ຄອບຄົວ ຖ້າພົບເຫັນໜໍ່ແໜງ ຂໍໃຫ້ແຈ້ງ ວອດແອັບ ປກສ ນວ ເບີ 020 28899774 ຫຼື ຜ່ານຊ່ອງທາງເຟັສບຸກ ປ້ອງກັນຄວາມສະຫງົບ ນະຄອນຫຼວງວຽງຈັນ.

ທີ່ມາ: ປ້ອງກັນຄວາມສະຫງົບນະຄອນຫຼວງວຽງຈັນ