ສິງກະໂປ​ ອອກມາດຕະການ ບໍ່ສັກວັກຊິນບໍ່ມີສິດໄດ້ຮັບການກວດ ແລະ ປິ່ນປົວ

ອີງຕາມຂ່າວຕ່າງປະເທດລາຍງານ: ກະຊວງສາທາລະນະສຸກສິງກະໂປ ໄດ້ອອກຖະແຫຼງໃນວັນທີ 10 ພະຈິກ​ 2021​ ຜ່ານມາວ່າ: ຕະຫຼອດໄລຍະເວລາທີ່ຜ່ານມາ ລັດຖະບານສິງກະໂປ ຮັບຜິດຊອບຄ່າໃຊ້ຈ່າຍທັງໝົດໃນການກວດ ແລະ ການປິ່ນປົວໂຄວິດ-19 ບໍ່ວ່າຄົນເຈັບຈະເປັນຄົນສິງກະໂປ ຫຼື ຄົນຕ່າງປະເທດ ທີ່ອາໄສຢູ່ຖາວອນໃນສິງກະໂປ ເພື່ອຫຼຸດຜ່ອນຄວາມບໍ່ແນ່ນອນທີ່ເກີດຈາກການລະບາດຂອງພະຍາດດັ່ງກ່າວ.

ປັດຈຸບັນ, ການສັກຢາວັກຊິນປ້ອງກັນພະຍາດໂຄວິດ-19 ໃນປະເທດສິງກະໂປ ກວມ 85% ຂອງປະຊາກອນ, ແຕ່ເຖິງແມ່ນວ່າຜູ້ທີ່ໄດ້ຮັບການສັກຢາວັກຊິນຄົບໂດສແລ້ວກໍຍັງມີໂອກາດຕິດໂຄວິດ-19 ໄດ້. ສະນັ້ນ,​ ຖ້າປະຊາກອນກຸ່ມນີ້ຕ້ອງໄດ້ຮັບການກວດ ແລະ ປິ່ນປົວພະຍາດດັ່ງກ່າວ ລັດຖະບານຈະຍັງສືບຕໍ່ເປັນຜູ້ເບີ່ງແຍງຄ່າໃຊ້ຈ່າຍໃຫ້. ນັ້ນໝາຍຄວາມວ່າພວກເຂົາຈະໄດ້ຮັບການກວດ ແລະ ປິ່ນປົວໂດຍບໍ່ໄດ້ເສຍຄ່າ.

ສໍາລັບຂອງປະຊາຊົນຈໍານວນໜຶ່ງ ຊຶ່ງສະໝັກໃຈປະຕິເສດ ທີ່ຈະເຂົ້າຮັບການສັກວັກຊິນປ້ອງກັນໂຄວິດ-19 ດ້ວຍເຫດຜົນທີ່ບໍ່ກ່ຽວຂ້ອງກັບການແພດ ນັບແຕ່ວັນທີ 8 ທັນວາ 2021 ເປັນຕົ້ນໄປ, ຖ້າພວກເຂົາເຈັບປ່ວຍດ້ວຍ ພະຍາດໂຄວິດ-19 ເຖິງຂັ້ນຕ້ອງເຂົ້າໂຮງໝໍ ຫຼື ສະຖານພະຍາບານປະເພດໃດໆກໍ່ຕາມ ບຸກຄົນນັ້ນຕ້ອງຮັບຜິດຊອບຄ່າໃຊ້ຈ່າຍປິ່ນປົວທັງໝົດເອງ. ຍົກເວັ້ນແຕ່ຄົນເຈັບທີ່ຜົນພິສູດທາງການແພດຢືນຢັນວ່າ ພວກເຂົາເຈົ້າບໍ່ສາມາດຮັບວັກຊິນໄດ້. ລວມທັງເດັກນ້ອຍອາຍຸຕໍ່າກວ່າ 12 ປີ.