ເມືອງເລົ່າງາມຈັດສົ່ງ ສາວໄທ ກັບຄືນປະເທດ ຫຼັງມາລັກຢູ່ກິນກັບໜຸ່ມລາວແບບບໍ່ຖືກຕ້ອງ

ສາລະວັນ: ໃນວັນທີ 4 ກັນຍາ 2020 ນີ້ ເວລາ 2 ໂມງ00ນາທີ ຢູ່ທີ່ສະໂມສອນກອງບັນຊາການ ປ້ອງກັນຄວາມສະຫງົບເມືອງເລົ່າງາມໄດ້ ຈັດພິທີ ມອບ-ຮັບ ນາງ ດາລາ ມີສະມິງ ຄົນສັນຊາດໄທ ກັບຄືນປະເທດ ທີ່ລັກເຂົ້າມາ ສປປ ລາວບໍ່ຖືກຕ້ອງຜິດກົດໝາຍໂດຍການເຂົ້າຮ່ວມຂອງທ່ານ ຄໍາຫວັນ ສີສະໝຸດ ກໍາມະການພັກເມືອງ, ຮອງເຈົ້າເມືອງໆເລົ່າງາມ, ຜູ້ຊີ້ນໍາວຽກງານວັດທະນະທໍາ-ສັງຄົມ, ມີທ່ານ ພາສຸກ ແກ້ວໄກສອນ ຕ່າງໜ້າກົງສູນໄທ ປະຈໍາຢູ່ແຂວງສະຫວັນນະເຂດ

ທ່ານ ນາງ ບຸນໂຮມ ໂງ່ນກະເສີມສຸກ ຮອງຫົວໜ້າພະແນກສາທາລະນະສຸກແຂວງສາລະວັນ, ພ້ອມດ້ວຍຄະນະໜ່ວຍສະເພາະກິດຄວບຄຸມ ສະກັດກັ້ນ ແລະ ແກ້ໄຂການລະບາດຂອງພະຍາດ ໂຄວິດ-19 ຂັ້ນແຂວງ, ຂັ້ນເມືອງ, ເຈົ້າໜ້າທີ່ ປກສ, ພະແນກຄຸ້ມຄອງຄົນຕ່າງປະເທດ ແລະ ຫ້ອງການກ່ຽວຂ້ອງເຂົ້າຮ່ວມ.ຕາມການລາຍງານຂອງກອງບັນຊາການ ປ້ອງກັນຄວາມສະຫງົບແຂວງສາລະວັນໃຫ້ຮູ້ວ່າ:

ນາງສາວ ດາລາ ມີສະມິງ ຄົນສັນຊາດໄທ ອາຍຸ 23ປີ ເກີດຢູ່ຕໍາບົນຫີນເຫຼັກໄຟ, ອໍາເພີຫົວຫີນ, ຈັ່ງຫວັດປະຈວບຂີລີຂັນ, ອາຊີບຊາວສວນ ໄດ້ລັກລອບເຂົ້າ ສປປ ລາວ ຜິດກົດໝາຍໃນຄັ້ງວັນທີ 7 ສິງຫາ 2020 ໂດຍໃຊ້ເຮືອເປັນພາຫະນະເຂົ້າມາ ທາງເມືອງແກ່ນທ້າວ ແຂວງໄຊຍະບູລີ ເພື່ອເດີນທາງມາຫາຄົນຮັກ ມີແຟນເປັນຄົນລາວ ຊື່ ທ້າວ ໂຢ່ງ ອາຍຸ 19 ປີ ທີ່ຢູ່ບ້ານຄຽງຕັ້ງແລ, ເມືອງເລົ່າງາມ ແຂວງສາລະວັນ ໄດ້ຄົບຫາກັນ 7-8 ເດືອນແລ້ວ

ເຊີ່ງທ້າວໂຢ່ງໄດ້ເຄີຍໄປເຮັດວຽກຢູ່ປະເທດໄທ ເປັນລູກຈ້າງຂອງແມ່ຜູ້ສາວ ເຮັດຟາມເຫັດ ຫຼັງຈາກນັ້ນໄດ້ກັບມາປະເທດລາວ (ແຂວງສາລະວັນ)ໃນວັນທີ 5 ສິງຫາ 2020 ທີ່ບ້ານເກີດຄຽງຕັງແລ, ເມືອງເລົ່າງາມ ແຂວງສາລະວັນ.ດັ່ງນັ້ນ ນາງສາວ ດາລາ ຈິ່ງໄດ້ລັກລອບເຂົ້າມາ ສປປ ລາວ ຕາມຫາຄົນຮັກ ຈົນພົບຍ້ອນຄວາມຮັກບໍ່ມີພົມແດນ ສະນັ້ນເຈົ້າໜ້າທີ່ ປກສ ຈິ່ງໄດ້ກັກຕົວ ເຂົ້າມາສູນກັກຕົວຂອງເມືອງ, ຜ່ານການຕິດຕາມກວດກາຫາເຊື້ອ ໂຄວິດ-19 ແມ່ນບໍ່ພົບເຊື້ອ ແລະ ໄດ້ສຶກສາອົບຮົມຄູ່ບ່າວສາວ

ຖ້າມັກຮັກກັນໃຫ້ເຮັດໜັງສືຈົດທະບຽນສົມລົດໃຫ້ຖືກຕ້ອງຕາມລະບຽບ-ຮີດຄອງປະເພນີ, ເພື່ອເສີມຂະຫຍາຍມູນເຊື້ອສາຍພົວພັນອັນດີງາມ ລະ ຫວ່າງສອງຊາດລາວ-ໄທໃຫ້ໄດ້ມີຄວາມແໜ້ນແຟ້ນຍິ່ງໆຈາກນັ້ນ ທັງສອງຝ່າຍ ກໍໄດ້ເຮັດບົດບັນທຶກເຊັນມອບ-ຮັບສົ່ງ ນາງ ດາລາ ມີສະມິງ ກັບຄືນປະເທດໄທໂດຍຕາງໜ້າກົງສູນໄທ ທ່ານ ພາສຸກ ແກ້ວໄກສອນ ແລະ ຕາງໜ້າເມືອງເລົ່າງາມແມ່ນ ທ່ານ ຄໍາຫວັນ ສີສະໝຸດ ຮອງເຈົ້າເມືອງໆເລົ່າງາມ

ໂດຍຊ້ອງໜ້າຄະນະໜ່ວຍສະເພາະກິດຄວບຄຸມ ສະກັດກັ້ນ ແລະ ແກ້ໄຂການລະບາດຂອງພະຍາດ ໂຄວິດ-19 ຂັ້ນແຂວງ, ຂັ້ນເມືອງ, ເຈົ້າໜ້າທີ່ ປກສ, ພະແນກຄຸ້ມຄອງຄົນຕ່າງປະເທດ ແລະ ຫ້ອງການກ່ຽວຂ້ອງເຂົ້າຮ່ວມເປັນສັກຂີພິຍານ.ໂດຍ: ພອນໄຊ (ນັກຂ່າວເມືອງເລົ່າງາມ)