ພິທີສົ່ງມອບລົດໄຟ EMUຂະບວນລ້ານຊ້າງ ໃຫ້ ສປປ ລາວ

ຂະບວນລົດໄຟ “ລ້ານຊ້າງ” ເຊິ່ງເປັນຂະບວນລົດໄຟ ໂດຍສານຄັ້ງປະຫວັດສາດ ທີ່ມີສີສັນສວຍສົດງົດງາມ ແລະ ພັດທະນາຕາມສີຂອງທຸງຊາດລາວ ປະກອບມີ: ສີແດງ, ສີຟ້າ ແລະ ສີຂາວ ໄດ້ມາເຖິງນະຄອນຫຼວງວຽງຈັນ ແລ້ວໃນຕອນເຊົ້າວັນທີ 16 ຕຸລາ 2021 ນີ້.

ໂດຍມີ ທ່ານ ວຽງສະຫວັດ ສີພັນດອນ ລັດຖະມົນຕີກະຊວງໂຍທາທິການ ແລະ ຂົນສົ່ງ,ພ້ອມດ້ວຍ ການນຳຈາກບັນດາກະຊວງ ທີ່ກ່ຽວ ຂ້ອງໃຫ້ການຕ້ອນຮັບຢ່່າງສົມກຽດ ຢູ່່ທີ່ສະຖານີຜູ້ໂດຍສານບ້ານໄຊ ເມືອງໄຊເສດຖາ ນະຄອນຫຼວງວຽງຈັນ.

ຕາມກຳນົດໝາຍຂອງລັດຖະບານແລ້ວ,​ເສັ້ນທາງລົດໄຟ ລາວ-ຈີນ ຈະມີກຳນົດເປີດການນຳໃຊ້ແລະແລ່ນຮັບໃຊ້ມວນຊົນຢ່່າງເປັນທາງການ ໃນວັນທີ 2 ທັນວາ 2021 ທີ່ຈະມາເຖິງນີ້,ພໍດີກົງກັບວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 46 ປີ

ພາຍຫຼັງເປີດການນຳໃຊ້ຢ່່າງເປັນທາງການ ຂະບວນລົດໄຟລາວ-ຈີນ ຈະບໍລິການຮັບໃຊ້ຜູ້ໂດຍສານ ແລະ ສິນຄ້າ ລະຫວ່າງ ສປປ ລາວ ແລະ ສປ ຈີນ.ພ້ອມກັນນີ້,ຍັງເປັນເສັ້ນທາງລົດໄຟເຊື່ອມຕໍ່ຢູ່່ໃນອະນຸພາກພື້ນຕື່ມອີກ.

ໂຄງການທາງລົດໄຟ ລາວ-ຈີນ ນອກຈາກຈະເປັນຂະບວນລົດໄຟ ເພື່ອຂົນສົ່ງຜູ້ໂດຍສານ ແລະ ສິນຄ້າແລ້ວ, ຍັງເປັນໂຄງການທີ່ມີຄວາມໝາຍຄວາມສຳຄັນ ທີ່ສະແດງເຖິງຄວາມສາມັກຄີແບບຍຸດທະສາດ ລະຫວ່າງ ສອງພັກ-ສອງລັດ ກໍຄື ປະຊາຊົນສອງຊາດ ລາວ-ຈີນ ທີ່ມີ ມາຢ່່າງຍາວນານຕື່ມອີກ.

ພ້ອມກັນນີ້,ກໍເປັນການເປີດສັກກະລາດໃໝ່ ແຫ່ງການເຊື່ອມໂຍງດ້ານການຄ້າ,ການຂົນສົ່ງ ຂອງ ສປປ ລາວ ກັບບັນດາປະເທດເພື່ອນບ້ານ,ອະນຸພາກພື້ນ ແລະ ສາກົນ ເຊິ່ງເປັນປະເທດດຽວໃນອາຊຽນ ທີ່ບໍ່ມີຊາຍແດນຕິດຈອດກັບທະເລ.