ເຈົ້າໜ້າທີ່ກັກຕົວຜູ້ຕ້ອງຫາຈຳນວນ 3 ຄົນ ພ້ອມຂອງກາງຢາບ້າ

ເວລາ 23:00 ໂມງ ຂອງວັນທີ 1 ຕຸລາ 2021 ໄດ້ມີພົນລະເມືອງດີ ແຈ້ງວ່າ: ມີການມົ້ວສຸມຢາເສບຕິດ ຢູ່ເຂດໜອງພະຍາ, ເມືອງໄຊທານີ ເຈົ້າໜ້າທີ່ ປກສ ເມືອງໄຊທານີ ຈຶ່ງໄດ້ສົມທົບກັບ ຫ້ອງການບ້ານໜອງພະຍາ ລົງກວດກາຕົວຈິງ ພົບເຫັນ ເປົ້າໝາຍ ຈຳນວນ 3 ຄົນ ຢູ່ເຮືອນຂອງ ທ້າວ ຍະ ອາຍຸ 38 ປີ ໜ່ວຍ 64 ບ້ານໜອງພະຍາ ເມືອງໄຊທານີ ນວ ຄື: ທ້າວ ພັນ ອາຍຸ 26 ປີ ກຳມະກອນ ຢູ່ບ້ານໄຊ ເມືອງໄຊ ແຂວງອຸດົມໄຊ, ທ້າວ ແພ ອາຍຸ 29 ປີ ກໍາມະກອນ ຢູ່ບ້ານໜອງພະຍາ ເມືອງໄຊທານີ ນວ ແລະ ທ້າວ ອາລຸນ ອາຍຸ 25 ປີ ກຳມະກອນ ຢູ່ບ້ານນາທົ່ມ ເມືອງໄຊທານີ ນວ ພ້ອມຂອງກາງຢາບ້າ 3 ເມັດ. ສ່ວນ ທ້າວ ຍະ ເຈົ້າຂອງເຮືອນ ເອົາຕົວລົບໜີ ປັດຈຸບັນເຈົ້າໜ້າທີ່ ປກສ ເມືອງໄຊທານີ ພວມສືບຄົ້ນຫານໍາຕົວມາດໍາເນີນຄະດີຕາມລະບຽບກົດໝາຍ.ກອງບັນຊາການ ປ້ອງກັນຄວາມສະຫງົບ ນະຄອນຫຼວງວຽງຈັນ ຮຽກຮ້ອງມາຍັງທຸກພາກສ່ວນເປັນເຈົ້າການປະຕິບັດ ສິດ-ພັນທະຂອງຕົນປະກອບສ່ວນ ເຂົ້າໃນວຽກງານຮັກສາຄວາມສະຫງົບ ຖ້າພົບເຫັນປະກົດການທີ່ເປັນໜໍ່ແໜງທີ່ຜິດຕໍ່ກົດໝາຍ ໃຫ້ລາຍງານ, ສົ່ງຂໍ້ຄວາມ, ຮູບພາບ, ວິດີໂອ, ສຽງ ແລະ ຫຼັກຖານອື່ນໆ ມາຍັງທາງວັອດແອັບເບີ 02028899774 ຮັບແຈ້ງຕະຫຼອດ 24 ຊົ່ວໂມງ ເພື່ອຮ່ວມແຮງຮ່ວມໃຈກັນປ້ອງກັນ, ສະກັດກັ້ນການແຜ່ລະບາດຂອງພະຍາດໂຄວິດ-19 ບໍ່ໃຫ້ແຜ່ລາມເປັນວົງກວ້າງ.

ທີ່ມາ ປ້ອງກັນຄວາມສະຫງົບນະຄອນຫຼວງວຽງຈັນ