ວັນທີ 17 ກັນຍາ ຜ່ານມາ, ພະແນກຕຳຫຼວດ ກອງບັນຊາການ ປກສ ເມືອງຫາດຊາຍຟອງ ນວ ໄດ້ນຳກຳລັງເຈົ້າໜ້າທີ່ວິຊາສະເພາະ ເຂົ້າປິດລ້ອມສະກັດຈັບເປົ້າໝາຍຢາເສບຕິດ ຢູ່່ເສັ້ນທາງເຂດບ້ານສາລະຄຳໃຕ້ ເມືອງຫາດຊາຍຟອງ ສາມາດຈັບເປົ້າໝາຍ ໄດ້ຄາລົດຟໍຈູນເນີ ຊື່ ທ້າວ ອຸດາສັກ ອາຍຸ 24 ປີ ຢູ່ບ້ານອຸດົມຜົນ ເມືອງໄຊທານີ ນວ,ພ້ອມຂອງກາງ ຢາບ້າ 12 ມັດ ເທົ່າກັບ 24.000 ເມັດ ຢູ່່ໃນລົດ ໄປດຳເນີນຄະດີ.
ຜ່ານການສອບສວນ ທ້າວ ອຸດາສັກ ສາລະພາບວ່າ: ໃນວັນທີ 17 ກັນຍາ ໄດ້ມີໄວລຸ້ນຢູ່່ບ້ານສາລາຄຳໃຕ້ ເມືອງຫາດຊາຍຟອງ ນວໂທລະ ສັບສັ່ງຊື້ຢາບ້າຈຳນວນ 12 ມັດ ເທົ່າກັບ 24.000 ເມັດ, ຫຼັງຈາກຕົກລົງລາຄາແລ້ວ ກໍນັດໝາຍສະຖານທີ່ສົ່ງຢາບ້າ.ຈາກນັ້ນ,ຕົນຈຶ່ງໄດ້ໂທສັ່ງຊື້ຢາບ້າ ໂດຍນັດຊື້ຂາຍກັນຢູ່່ເຂດບ້ານໃໝ່ ເມືອງສີໂຄດຕະບອງ,ຮອດເວລາປະມານ 15:30 ໂມງ ຂອງວັນດຽວກັນ ກໍໄດ້ຂັບຂີ່ລົດຟໍຈູນເນີ ສີຂາວ ເລກທະບຽນ ກພ 7435 ກຳແພງນະຄອນ ໄປຮັບເອົາຢາບ້າຢູ່່ຈຸດນັດໝາຍ.
ຫຼັງຈາກໄດ້ຢາບ້າ ຈຳນວນ 12 ມັດ ເທົ່າກັບ 24.000 ເມັດ ກໍຂີ່ມາຈອດລໍຖ້າສົ່ງຢາບ້າໃຫ້ໄວລຸ້ນທີ່ສັ່ງຊື້ ຢູ່່ແຄມທາງເຂດບ້ານສາລາຄໍາໃຕ້ ເມືອງຫາດຊາຍຟອງ ນວ, ພໍຮອດເວລາປະມານ 16:00 ໂມງ ກໍຖືກເຈົ້າໜ້າທີ່ຈັບຕົວ ພ້ອມກວດຄົ້ນລົດ ພົບຢາບ້າຈຳນວນດັ່ງກ່າວ.
ປັດຈຸບັນຄະດີດັ່ງກ່າວ, ເຈົ້າໜ້າທີ່ກອງບັນຊາການ ປກສ ເມືອງຫາດຊາຍຟອງ ພວມສອບສວນຂະຫຍາຍຜົນ ເພື່ອສືບຕໍ່ດຳເນີນຄະດີຕາມຂັ້ນຕອນຂອງກົດໝາຍ.
ຂ່າວ-ພາບ: ປກສ ນະຄອນຫຼວງວຽງຈັນ
Discussion about this post