ເຈົ້າແຂວງສາລະວັນ ລົງຕິດຕາມສະພາບນໍ້າຖ້ວມຢູ່່ບ້ານຫ້ວຍແສງ ເມືອງເລົ່າງາມ

ຕອນບ່າຍວັນທີ 24 ກັນຍາ ນີ້, ທ່ານ ໂພໄຊ ໄຊຍະສອນ ເຈົ້າແຂວງສາລະວັນ,ພ້ອມດ້ວຍຂະແໜງການກ່ຽວຂ້ອງຂອງແຂວງ ແລະ ການນຳເມືອງເລົ່າງາມ ລົງຕິດຕາມສະພາບນໍ້າຖ້ວມ ຢູ່່ບ້ານຫ້ວຍແສງ ເມືອງເລົ່າງາມ,ຈາກການປະເມີນຜົນເສຍຫາຍເບື້ອງຕົ້ນ ມີໜອງປາ ເສຍ ຫາຍ 47 ໜອງ, ລານຕາກກາເຟ 2 ລານ, ເຮືອນຄົວ ແລະ ຮ້ານຂາຍເຄື່ອງແຫ້ງເສຍຫາຍ ຈໍານວນໜຶ່ງ.ພ້ອມນີ້, ຍັງມີເຄື່ອງປູກຂອງປະ ຊາຊົນ ເປັນຕົ້ນ ກະເຟ ແລະ ພືດຜັກ ໄດ້ຮັບຄວາມເສຍຫາຍ 5 ເຮັກຕາ ຄິດເປັນມູນຄ່າເສຍຫາຍເກືອບ 200 ລ້ານກີບ.

ທ່ານ ສົມສັກ ທົງຄຳຫານ ເຈົ້າເມືອງເລົ່າງາມ ໃຫ້ຮູ້ວ່າ: ໃນວັັນທີ 24 ກັນຍາ ນີ້ ໄດ້ເກີດມີຝົນຕົກຕໍ່ເນື່ອງ ເຮັດໃຫ້ນໍ້າປ່່າໄຫຼລົ້ນຫ້ວຍຕະພົງ ແລ້ວໄຫຼເຂົ້າບ້ານຫ້ວຍແສງ ເຮັດໃຫ້ປະຊາຊົນ 30 ກວ່າຫຼັງຄາເຮືອນ ຢູ່່ລຽບຕາມຫ້ວຍ ແລະ ຢູ່່ພື້ນທີ່ຕໍ່າໄດ້ຮັບຜົນກະທົບ ແລະ ຂາດທີ່ ພັກອາໄສ, ເຊິ່ງນໍ້າໄດ້ຖ້ວມເຮືອນ, ວັດຖຸສິ່ງຂອງ ແລະ ເນື້ອທີ່ທຳການຜະລິດ.

ຕໍ່ເຫດການດັ່ງກ່າວ.ອົງການປົກຄອງເມືອງເລົ່າງາມ, ພ້ອມດ້ວຍຂະແໜງການກ່ຽວຂ້ອງ, ກຳລັງ ປກສ-ປກຊ ສົມທົບກັບກຳລັງຊາວໜຸ່ມຂອງບ້ານ ໄດ້ເຂົ້າໄປຊ່ວຍເຫຼືອຢ່່າງຮີບດ່ວນ, ພ້ອມເກັບມ້ຽນວັດຖຸສິ່ງຂອງ, ຍົກຍ້າຍສິ່ງກີດຂວາງ ແລະ ຍົກຍ້າຍປະຊາຊົນທີ່ໄດ້ຮັບຜົນກະທົບໄປຢູ່່ບ່ອນທີ່ປອດໄພ ໂດຍກຳນົດ 3 ຈຸດ ຄື: ໂຮງຮຽນ, ວັດ ແລະ ຫ້ອງການບ້ານ ເປັນບ່ອນພັກຊົ່ວຄາວ.

ພາຍຫຼັງນໍ້າບົກແຫ້ງ,ຄະນະກຳມະການຄຸ້ມຄອງໄພພິບັດຂັ້ນເມືອງ ຈະສົມທົບກັບການຈັດຕັ້ງບ້ານ ລົງຕິດຕາມກວດກາ, ເກັບກໍາຂໍ້ມູນຜົນເສຍຫາຍ ເພື່ອລາຍງານໃຫ້ຂັ້ນເທິງຮັບຊາບ ແລະ ຊອກຫາວິທີຊ່ວຍເຫຼືອປະຊາຊົນທີ່ໄດ້ຮັບຜົນກະທົບ.

ໃນໂອກາດນີ້, ທ່ານເຈົ້າແຂວງສາລະວັນ ໄດ້ເນັ້ນໃຫ້ອົງການປົກຄອງເມືອງ ແລະ ການຈັດຕັ້ງບ້ານ ເອົາໃຈໃສ່ປຸກລະດົມກຳລັງໃຫ້ມີຄວາມສາ ມັກຄີ, ມີນໍ້າໃຈຊ່ວຍເຫຼືອເຊິ່ງກັນແລະກັນ ໃຫ້ວ່ອງໄວ ແລະ ປຸກລະດົມນຳຫຼາຍພາກສ່ວນ ເພື່ອຂໍການຊ່ວຍເຫຼືອ ແລະ ພ້ອມກັນ ມີສະຕິຕິດຕາມສະພາບອາກາດໃນແຕ່ລະໄລຍະ ເພື່ອກຽມຄວາມພ້ອມຮັບມືກັບເຫດການທີ່ອາດຈະເກີດຂຶ້ນໃນຕໍ່ໜ້າ.