ກັກຕົວເປົ້າໝາຍຢາເສບຕິດພ້ອມຢາ 237 ເມັດ ແລະ ປືນ 1 ກະກອບ

ວັນທີ 23 ກັນຍາ ຜ່ານມາ,ສະຖານີຮັບແຈ້ງ ແລະ ແກ້ໄຂເຫດສຸກເສີນ1191 ເມືອງປາກງື່ມ ໄດ້ສົມທົບກັບ ປກສ ກຸ່ມບ້ານໂດນ ເມືອງປາກ ງື່ມ ນະຄອນຫຼວງວຽງຈັນ ກັກຕົວເປົ້າໝາຍຢາເສບຕິດ ຊື່ ທ້າວ ຄໍາຟອງ ອາຍຸ 45 ປີ ຢູ່່ບ້ານທ່າກອກ ເມືອງປາກງື່ມ ພ້ອມຂອງກາງຢາບ້າ 237 ເມັດ ແລະ ປືນສັ້ນ 1 ກະບອກ ພ້ອມດ້ວຍລູກປືນ 16 ລູກ ສົ່ງໃຫ້ ປກສ ເມືອງປາກງື່ມດໍາເນີນຄະດີ.

ຜ່ານການສອບສວນເບື້ອງຕົ້ນ ຜູ້ກ່ຽວສາລະພາບວ່າ: ຜ່ານມາເສບຢາບ້າ ມື້ລະ2-3 ເມັດ ແລະ ມາປັດຈຸບັນ ແມ່ນເສບ ມື້ລະ 10-15 ເມັດ,ສ່ວນຢາບ້າທີ່ນໍາມາເສບແຕ່ລະຄັ້ງ ແມ່ນຊື້ຢູ່່ບ້ານເວີນແຄນ ເມືອງປາກງື່ມ ແລະ ຢາບ້າ ຈຳນວນ 237 ເມັດ ທີ່ເຈົ້າໜ້າທີ່ ກວດພົບເຫັນນັ້ນ ແມ່ນຂອງຕົນເອງແທ້.

ສ່ວນອາວຸດປືນສັ້ນ 1 ກະບອກ ແມ່ນໄດ້ຊື້ມາແຕ່ປະເທດເພື່ອນບ້ານ ແຕ່ປີ 2018, ປັດຈຸບັນ ຄະດີຢາເສບຕິດດັ່ງກ່າວ ເຈົ້າໜ້າທີ່ກອງບັນຊາການ ປກສ ເມືອງປາກງື່ມ ພວມເປີດກວ້າງຂະຫຍາຍຜົນ ເພື່ອສືບຕໍ່ດໍາເນີນຄະດີຕາມຂັ້ນຕອນຂອງກົດໝາຍ.