ຫວັງລັກເອົາສັບສິນລັກງັດເບາະລົດຈັກ

ທ້າວ ສົມໝາຍ ອາຍຸ 29 ປີ ວ່າງງານຢູ່ບ້ານ ກວນກະຈາ ເມືອງຫີນບູນ ແຂວງຄໍາມ່ວນ. ປັດຈຸບັນ, ພັກເຊົາຢູ່ບ້ານຮ່ອງແຊງ ເມືອງຈັນທະບູລີ ນວ ຖືກເຈົ້າໜ້າທີ່ຕໍາຫຼວດ ກອງພັນປ້ອງກັນເຄື່ອນທີ່ ນວ ກັກ ຕົວ ໃນວັນທີ 21 ສິງຫາ 2021 ໃນຂໍ້ຫາລັກຊັບພົນລະເມືອງ. ຈາກນັ້ນ, ສົ່ງຕົວໃຫ້ ກອງບັນຊາການ ປກສ ເມືອງໄຊເສດຖາ ນວ ດໍາເນີນຄະດີ.

ເຈົ້າໜ້າທີ່ ກອງບັນຊາການ ປກສ ເມືອງໄຊເສດຖາ ນວ ໃຫ້ຮູ້ວ່າ: ຜ່ານການສອບສວນ ຜູ້ກ່ຽວໃຫ້ການຮັບສາລະພາບວ່າ: ຜ່ານມາ, ຜູ້ກ່ຽວເຄີຍຖືກດໍາເນີນຄະດີມາແລ້ວ 1 ຄັ້ງ ໃນຂໍ້ຫາລັກຊັບພົນລະເມືອງ ແລະ ຖືກສານຕັດສິນຕັດອິດສະຫຼະພາບ 3 ປີ. ຮອດວັນທີ 27 ພຶດສະພາ 2021, ຈຶ່ງໄດ້ຮັບການປ່ອຍຕົວ.

ຫຼັງຈາກນັ້ນ, ກໍກັບໄປຢູ່ບ້ານເກີດ ຮອດປະມານເດືອນ ມິຖຸນາ 2021 ໄດ້ເຂົ້າມານະຄອນຫຼວງວຽງຈັນ ເພື່ອຊອກວຽກເຮັດອີກ ແລະ ໄດ້ເຊົ່າຫ້ອງແຖວຢູ່ກັບນ້ອງສາວ ເຂດບ້ານຮ່ອງແຊງ. ຕົກມາວັນທີ 21 ສິງຫາ 2021, ຜູ້ກ່ຽວໄດ້ໄປງັດເບາະລົດຈັກ ທີ່ປະຊາຊົນຈອດໄວ້ຢູ່ ເດີ່ນທາດຫຼວງ ເພື່ອຫວັງເອົາຊັບສິນມີຄ່າ ແລະ ຜູ້ກ່ຽວໄດ້ໃຊ້ຄວາມພະຍາຍາມຢູ່ 3 ຄັ້ງແຕ່ບໍ່ໄດ້ຫຍັງ ເມື່ອເຈົ້າໜ້າທີ່ພົບເຫັນຈຶ່ງໄດ້ເຂົ້າກັກຕົວໄປດຳເນີນຄະດີ.

ປັດຈຸບັນ, ເຈົ້າໜ້າທີ່ພວມດໍາເນີນການສອບສວນ ເພື່ອສະຫຼຸບສໍານວນຄະດີ ສົ່ງໃຫ້ໄອຍະການດໍາເນີນ ຕາມຂັ້ນຕອນຂອງກົດໝາຍ.