ແຂວງຄຳມ່ວນຫ້າງຫາກະກຽມເຄື່ອງຊ່ວຍເຫລືອປະຊາຊົນໄດ້ຮັບຜົນກະທົບໃນຊ່ວງໄລຍະປິດເມືອງ

ດ້ວຍຄວາມເປັນຫວ່ງເປັນໄຍຂອງຄະນະພັກ – ອຳນາດການປົກຄອງແຂວງຄຳມ່ວນທີ່ມີຕໍ່ພໍ່ແມ່ ປະຊາຊົນ ທີ່ໄດ້ຮັບຜົນກະທົບຈາກໂຄວິດ-19. ໂດຍສະເພາະໃນຊ່ວງທີ່ແຂວງຄໍາມ່ວນພວກເຮົາພວມ ປະຕິບັດມາດຕະການຢ່າງເຂັ້ມງວດ ( ປິດເມືອງ ) ເພື່ອຄວບຄຸມປ້ອງກັນ ແລະ ສະກັດກັ້ນການແຜ່ລະບາດ ຂອງໂຄວິດ-19 ທີ່ຂະຫຍາຍເປັນວົງກວ້າງໃນປະຈຸບັນ. ປະຊາຊົນ, ຊາວຄ້າຂາຍ, ລວມເຖິງພະນັກ ງານຈຳນວນໜຶ່ງທີ່ພົບຄວາມຫຍຸ້ງຍາກ. ໃນຕອນເຊົ້າຂອງວັນທີ 18 ກັນຍາ 2021 ການນຳແຂວງຄຳມ່ວນນຳໂດຍ ທ່ານ ປ.ອ ແກ້ວອຸດອນ ບຸດສິງຂອນ ຮອງເຈົ້າແຂວງຄຳມ່ວນ ແລະ ທ່ານ ປ.ອ ສົມສະອາດ ອຸ່ນສີດາ ຮອງເຈົ້າແຂວງຄຳມ່ວນ ທັງເປັນຮອງຫົວໜ້າຄະນະສະເພາະກິດແຂວງ, ມີຄະນະສະເພາະກິດຂອງແຂວງ, ຄະນະສະເພາະກິດຂອງເມືອງ ແລະ ກຳລັງຊາວໜຸ່ມຕະລຸມບອນ ໄດ້ກະກຽມເຂົ້າສານອາຫານແຫ້ງ ເພື່ອລົງຊຸກຍູ້ປະຊາຊົນທີ່ໄດ້ຮັບຜົນກະທົບ.

ທ່ານ ປ.ອ ສົມສະອາດ ອຸ່ນສີດາ ຮອງເຈົ້າແຂວງຄຳມ່ວນໄດ້ໃຫ້ສຳພາດຕໍ່ສື່ມວນຊົນທ້ອງຖິ່ນວ່າ : ຂ້າພະເຈົ້າຂໍກ່າວສະບາຍດີຜ່ານທາງສື່ມວນຊົນມາຍັງສັງຄົມທຸກທົ່ວໜ້າ ໃນສະພາບທີ່ປິດເມືອງນີ້ເຊິ່ງການນຳແຂວງກໍ່ບໍ່ໄດ້ນີ້ງນອນໃຈຕໍ່ປະຊາຊົນທີ່ໄດ້ຮັບຜົນກະທົບ ໂດຍໄດ້ມອບໃຫ້ສະເພາະກິດຂອງແຂວງ, ເມືອງ, ສົມທົບກັບອຳນາດການປົກຄອງບ້ານສັງລວມຄອບຄົວທີ່ໄດ້ຮັບຜົນກະທົບ. ໃນນັ້ນມີຈຳນວນໜຶ່ງທີ່ໄດ້ຮັບຜົນກະທົບໜ້ອຍ ແລະ ຈຳນວນໜຶ່ງແມ່ນໄດ້ຮັບຜົນກະທົບຫລາຍຕໍ່ສະພາບການດັ່ງກ່າວການນຳແຂວງເຫັນໄດ້ເຖິງຄວາມຈຳເປັນ ແລະ ເພື່ອປະຕິບັດນະໂຍບາຍກໍ່ໄດ້ມີການກະກຽມເຄື່ອງຊ່ວຍເຫລືອປະເພດເຂົ້າສານ, ໜີ່ ແລະ ປາກະປອງ ເພື່ອນຳໄປແຈກຢາຍໃຫ້ປະຊາຊົນ ເພື່ອເຮັດແນວໃດໃຫ້ເຂົາເຈົ້າມີຂວັນກຳລັງໃຈ ແລະ ສາມາດຜ່ານຜ່າວິກິດນີ້ໄປໄດ້ດ້ວຍດີ.

ທ່ານ ປ.ອ ສົມສະອາດ ອຸ່ນສີດາ ຍັງໄດ້ກ່າວຕື່ມອີກວ່າ : ໂອກາດນີ້ຕາງໜ້າການນຳຂອງແຂວງ ຄຳມ່ວນ ຂໍສະແດງຄວາມຊົມເຊີຍມາຍັງພໍ່ແມ່ປະຊາຊົນທີ່ໄດ້ໃຫ້ຄວາມຮ່ວມມືກັບອຳນາດການປົກຄອງ ແລະ ເຫັນໄດ້ຄວາມສຳຄັນ ເຫັນໄດ້ຄວາມອັນຕະລາຍຂອງພະຍາດນີ້ໂດຍບໍ່ອອກຈາກບ້ານ, ຈາກເຮືອນ ປະຕິບັດມາດຕະການຂອງຂັ້ນເທິງວາງອອກໄດ້ຢ່າງເຂັ້ມງວດ ແລະ ເຄື່ອງທີ່ຈະນຳໄປແຈກຢາຍນີ້ແມ່ນຈະໄດ້ແຈກ ທຸກບ້ານໂດຍສະເພາະຄອບຄົວປະຊາຊົນທີ່ໄດ້ຮັບຜົນກະທົບໜັກພາຍຫລັງສຳເລັດການຫ້າງຫາກະກຽມ.

ຂອບໃຈແຫຼ່ງຂ່າວຈາກ: ຄໍາມ່ວນ