ໜຸ່ມສະຫະລັດ ພົບຈົດໝາຍໃນຂວດແກ້ວ ທີ່ສົ່ງຈາກທະຫານຣັດເຊຍ ເມື່ອ 50 ປີກ່ອນ

ສຳນັກຂ່າວຕ່າງປະເທດລາຍງານວ່າ ຊາຍໜຸ່ມໃນລັດອະລາສກາ ໄດ້ຄົ້ນພົບຈົດໝາຍໃນຂວດແກ້ວລອຍມາຕິດແຄມຝັ່ງທະເລ ເມື່ອເປີດອອກມາເບິ່ງພົບວ່າ ເປັນເຈ້ຍຂຽນຂໍ້ຄວາມພາສາຣັດເຊຍໃນສະໄໝສົງຄາມເຢັນ ເມື່ອປະມານ 50 ປີກ່ອນ ໂດຍເຊື່ອວ່າໜ້າຈະເປັນຈົດໝາຍຈາກທະຫານຣັດເຊຍໃນສະໄໝນັ້ນ

ເທເລີ ກັບລູກຂອງລາວໄດ້ຄົ້ນພົບສິ່ງລໍ້າຄ່າ ຫຼັງຈາກທີ່ພວກເຂົາຍ່າງຫຼິ້ນຢູ່ໃນເມືອງຊິຊມາເຣຟ ທາງພາກຕາເວັນຕົກສ່ຽງເໜືອຂອງລັດ ບໍລິເວນຊ່ອງແຄບເບຣິງ ເມື່ອວັນທີ 5 ສິງຫາທີ່ຜ່ານມາ ລາວໄດ້ພົບກັບຂວດແກ້ວທີ່ລອຍມາແຄມຝັ່ງ ໂດຍພົບວ່າຂວດແກ້ວດັ່ງກ່າວມີການປິດຝາເອົາໄວ້ຢ່າງແຈບດີ. ເມື່ອນຳຂຶ້ນມາກວດສອບກໍພົບວ່າພາຍໃນມີແຜ່ນເຈ້ຍບັນຈຸຢູ່.

ລາວບອກວ່າ ລູກໆຂອງລາວຮູ້ສຶກຕື່ນເຕັ້ນກັບການຄົ້ນພົບຄັ້ງນີ້ຫຼາຍ ເພາະພວກເຂົາເຄີຍເຫັນແຕ່ໃນກາຕູນຈຳພວກຈົດໝາຍຂອງໂຈນສະຫຼັດ ຫຼື ແຜນທີ່ສົມບັດ ແຕ່ເມື່ອສ່ອງເບິ່ງໃກ້ໆພົບວ່າເຈ້ຍທີ່ບັນຈຸຢູ່ດ້ານໃນນັ້ນເປັນພາສາຣັດເຊຍ ກ່ອນທີ່ລາວຈະໂພສລົງເຟສບຸກປະກາດຫາໝູ່ເພື່ອນມາຊ່ວຍແປຈົດໝາຍພາສາຣັດເຊຍສະບັບນີ້.

ຂໍ້ຄວາມຂອງລາວຖືກສົ່ງຕໍ່ອອກໄປເປັນວົງກວ້າງ ຈົນມີຜູ້ທີ່ຮູ້ພາສາຣັດເຊຍນຳມາຊ່ວຍແປ ກ່ອນຈະພົບວ່າເປັນຈົດໝາຍຂອງທະຫານຣັດເຊຍທີ່ຂຽນໄວ້ເມື່ອປີ 1969 ຫຼື ເມື່ອ 50 ປີກ່ອນ ໂດຍແປຂໍ້ຄວາມດັ່ງກ່າວວ່າ:
“ຂໍສະແດງຄວາມນັບຖືຈາກໃຈ! ຈາກເຮືອຮົບຣັດເຊຍຕາເວັນອອກໄກ VRXF Sulak. ຂ້ອຍຮູ້ສຶກດີໃຈ ບໍ່ວ່າໃຜຈະເກັບແກ້ວນີ້ໄດ້ ແລະ ພົບຂໍ້ຄວາມນີ້, ຂໍໃຫ້ທ່ານຊ່ວຍສົ່ງຂ່າວໄປຫາ Vladivostok-43 BRXF Sulak ເຖິງຂ່າວຄາວຂອງລູກເຮືອທຸກຄົນ. ພວກເຮົາຂໍອວຍພອນໃຫ້ທ່ານມີສຸຂະພາບແຂງແຮງ ອາຍຸໝັ້ນຂວັນຍືນ ລວມທັງຂໍໃຫ້ມີຄວາມສຸກໃນການລ່ອງເຮືອ. ລົງວັນທີ 20 ມິຖຸນາ 1969”.

ໃນເວລາຕໍ່ມາ ສື່ທ້ອງຖິ່ນຂອງຣັດເຊຍກໍໄດ້ລາຍງານການຄົ້ນພົບຈົດໝາຍພາສາຣັດເຊຍໃນຄັ້ງນີ້. ປາກົດວ່າ ກັບຕັນບັອດຊາເນນກາ ອະດີດທະຫານເຮືອໄດ້ອອກມາເປີດເຜີຍວ່າ ຂໍ້ຄວາມໃນຈົດໝາຍສະບັບນີ້ອາດຈະເປັນລາຍມືຂອງລາວທີ່ຂຽນໄວ້ໃນໄລຍະສົງຄາມ ເຊິ່ງລາວເອງກໍຍັງບໍ່ແນ່ໃຈ ແຕ່ໃນສະໄໝນັ້ນລາວໄດ້ຂຽນຈົດໝາຍລາຍງານເຊັ່ນນີ້ເປັນປະຈຳ.