104ຄົນມີອາການ ຫຼັງຈາກການສັກຢາວັກຊີນຕ້ານພະຍາດ ໂຄ ວິ ດແຕ່ບໍ່ມີຜູ້ເສຍຊີວິດ

ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19, ຕາງໜ້າໂດຍ ທ່ານດຣ ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ ໃຫ້ຮູ້ວ່າ:

ຮອດວັນທີ 23 ມິຖຸນາ 2021 ຢູ່ ສປປ ລາວ ສາມາດສັກຢາວັກຊີນ ປ້ອງກັນພະຍາດໂຄວິດເຂັມທີ 1 ໄດ້ແລ້ວ 853.782 ຄົນ ແລະ ເຂັມ ທີ 2 ຈໍານວນ 494.477 ຄົນໃນຂອບເຂດທົ່ວປະເທດ ທີ່ເປັນກຸ່ມສ່ຽງ ແລະ ປະຊາຊົນທົ່ວໄປ ຊຶ່ງຈໍານວນ ຜູ້ໄດ້ຮັບການສັກຢາວັກຊີນນັ້ນ ພົບວ່າມີ 104 ຄົນ ທີ່ເກີດອາການສົນພາຍຫຼັງຈາກການສັກວັກຊີນ

ໃນນີ້ ມີອາການເບົາບາງ 95 ຄົນໂດຍມີອາການ ໄຂ້ ເລັກນ້ອຍ ແລະ ປວດຕົນຕົວ ແລະ 9 ຄົນມີອາການ ຮຸນແຮງໂດຍມີອາການຮາກ ແລະ ປຸ້ນທ້ອງໄດ້ເຂົ້າ ປິ່ນປົວຢູ່ໂຮງໝໍ ແລະ ມີອາການດີຂຶ້ນ ຊຶ່ງໂດຍລວມ ແລ້ວ ບໍ່ມີໃຜມີອາການຜິດປົກກະຕິຫຍັງ ແລະ ບໍ່​ມີ ​ຜູ້​ເສຍ​ຊີ​ວິດ​ຈາກ​ການ​ສັກ​ວັກ​ຊີນ​ຕ້ານ​ພະ​ຍາດ​ດັ່ງ​ກ່າວ.

ທ່ານດຣ ພອນປະເສີດ ໃຫ້ຮູ້ຕື່ມວ່າ: ມາຮອດປະຈຸບັນ, ວັກຊີນທີ່ນໍາໃຊ້ຢູ່ລາວປະກອບມີ 4 ຊະນິດຄື: ຊິໂນຟາມ, ແອສຕຣາເຊເນກາ , ໄຟເຊີ ແລະ ສະປຸກນິກ ຊຶ່ງ ສປປ ລາວເຮົາໄດ້ຮັບໂຄຕ້າທີ່ ຈະໄດ້ຮັບວັກຊີນທັງໝົດ 6.606.084 ໂດສ ແຕ່ການຈັດສັນວັກຊີນນັ້ນ ອາດຈະບໍ່ຕອບສະ ໜອງ ໄດ້ຕາມຄວາມຕ້ອງການຂອງປະເທດເຮົາ , ຮອດປະຈຸບັນນີ້ໄດ້ພຽງແຕ່ 2.135.620 ໂດສເທົ່ານັ້ນ.

ສະເພາະຢູ່ນະຄອນຫຼວງວຽງຈັນ ການສັກວັກຊີນຊິໂນຟາມ ແລະ ໄຟເຊີເຂັມທີ1 ໄດ້ສັກໝົດແລ້ວ ໂດຍຈະມີການສັກຮອບ 3 ເຂັມທີ 1 ໃນເດືອນກໍລະກົດ 2021 ທີ່ຈະມາເຖິງ, ແຕ່ຍັງສືບຕໍ່ສັກເຂັມທີ2.