🛣️ໂຄງການທາງດ່ວນລາວ-ຈີນ​ ຕອນເໜືອໄດ້ສໍາເລັດການສຳຫຼວດອອກແບບ.

ໂຄງການສ້າງທາງດ່ວນໄລຍະທີ 2, 3 ແລະ 4 ກໍຄືເສັ້ນທາງແຕ່ເມືອງວັງວຽງ-ຫຼວງພະບາງ, ຫຼວງພະບາງ-ອຸດົມໄຊ, ອຸດົມໄຊ-ບໍ່ເຕັນແຂວງຫຼວງນໍ້າທາ ທີ່ຕິດກັບຊາຍແດນ ສປ ຈີນ ມາຮອດປັດຈຸບັນໄດ້ສໍາເລັດວຽກງານກ່ອນການກໍ່ສ້າງຈໍານວນໜຶ່ງ.

ທ່ານ ທາວຈູນ (TaoJun) ຮອງຜູ້ອໍານວຍການບໍລິສັດຮ່ວມທຶນພັດທະນາບໍລິສັດທາງດ່ວນລາວ-ຈີນ ໃຫ້ສໍາພາດຕໍ່ສຳນັກຂ່າວ CRI ເມື່ອບໍ່ດົນມານີ້ໃຫ້ຮູ້ວ່າ: ໂຄງການທາງດ່ວນໄລຍະດັ່ງກ່າວໄດ້ສໍາເລັດຂັ້ນຕອນກ່ອນການກໍ່ສ້າງຈໍານວນໜຶ່ງຄື: ສໍາເລັດການສໍາຫຼວດພາກສະໜາມ, ການພົວພັນກັບອຳນາດການປົກຄອງທ້ອງຖິ່ນ,ບົດບັນທຶກຄວາມເຂົ້າໃຈການກູ້ຢືມທຶນ,ລວມໄປເຖິງການປະເມີນຜົນກະທົບໃນເບື້ອງຕົ້ນຕໍ່ສະພາບຄວາມເປັນຈິງໃນໄລຍະມີການລະບາດຂອງພະຍາດໂຄວິດ-19 ທີ່ຈະສົ່ງຜົນຕໍ່ການນໍາເຂົ້າວັດຖຸອຸປະກອນຕ່າງໆມີຄວາມຊັກຊ້າ, ຄວາມບໍ່ສະດວກໃນການກໍ່ສ້າງ ແລະ ບັນຫາອື່ນໆ, ເຊິ່ງຄາດວ່າການກໍ່ສ້າງເສັ້ນທາງດ່ວນນີ້ຈະໃຊ້ເວລາເຖິງ10 ປີຈຶ່ງຈະສໍາເລັດ.

ຂໍ້ມູນຫຼ້າສຸດໂຄງການເສັ້ນທາງດ່ວນລາວ-ຈີນແຕ່ນະຄອນຫຼວງວຽງຈັນ ຫາ ຊາຍແດນລາວ-ຈີນ ມີຄວາມຍາວທັງໝົດປະມານ 440 ກວ່າກິໂລແມັດ, ສະເພາະໄລຍະທີ 1 ທີ່ສ້າງສຳເລັດແລ້ວແມ່ນມີຄວາມຍາວ 111 ກມ. ສວ່ນທີ່ຍັງເຫຼືອແມ່ນມີປະມານ 329 ກມ. ຫາກໂຄງການກໍ່ສ້າງທາງດວ່ນສຳເລັດຢ່າງສົມບຸນ, ນອກຈາກປະຫຍັດເວລາໃນການເດີນທາງແລ້ວ ຍັງຈະອຳນວຍຄວາມສະດວກໃຫ້ແກ່ການພັດທະນາເສດຖະກິດ-ສັງຄົມຂອງສປປລາວ,ໂດຍສະເພາະຈະສົ່ງເສີມການຄ້າ, ການທ່ອງທ່ຽວໃຫ້ເຕີບໃຫຍ່ຂະຫຍາຍຕົວຢ່າງກ້າວກະໂດດ ແລະ ສປປ ລາວ ຈະຖືກປ່ຽນທີ່ຕັ້ງຈາກປະເທດທີ່ບໍ່ມີທາງອອກສູ່ທະເລມາເປັນປະເທດເຊື່ອມໂຍງເຊື່ອມຈອດເຂົ້າກັບຍຸດທະສາດໜຶ່ງແລວໜຶ່ງເສັ້ນທາງຂອງ ສປ ຈີນ ຢ່າງມີປະສິດ ທິພາບ ແລະ ຕ່າງຝ່າຍຕ່າງມີຜົນປະໂຫຍດຮ່ວມກັນ.