ຂ່າວດີ ສປ ຈີນຈະນໍາວັກຊີນປ້ອງກັນໂຄ ວິ ດ-19 ມາຊ່ວຍສປປລາວຮອບສາມ

ສປ ຈີນຈະນໍາວັກຊີນປ້ອງກັນໂຄ ວິ ດ-19 ມາຊ່ວຍສປປລາວຮອບສາມໃນຖານະທີ່ເປັນຄູ່ຮ່ວມຊາຕາກຳທີ່ຄຽງບ່າຄຽງໄຫຼ່ ແລະໃຫ້ການຊ່ວຍເຫລືອຊຶ່ງກັນ ແລະກັນຕະຫລອດມາ ຈີນຈະຕັ້ງຫນ້າຈັດຕັ້ງປະຕິບັດການຕົກລົງທີ່ເປັນເອກກະພາບກັນຂອງເລຂາທິການໃຫຍ່ສອງພັກ ສືບຕໍ່ສະຫນັບສະຫນູນການຕໍ່ສູ້ຕ້ານກັບການລະບາດຂອງພະຍາດໂຄວິດ-19, ພະຍາຍາມສະໜອງຢາວັກຊິນເປັນຄັ້ງທີ 3 ໃຫ້ແກ່ຝ່າຍລາວ. ທ່ານ ຈ່ຽງ ຈ້າຍຕົ່ງ ເອກອັກຄະລັດຖະທູດຈີນປະຈໍາລາວກ່າວຢືນຢັນເມື່ອວັນທີ 23 ເມສາ 2021 ເນື່ອງໃນໂອກາດກ່າວຄໍາປາໄສລະນຶກວັນສ້າງຕັ້ງສ້າງສາຍພົວພັນການທູດຈີນ-ລາວ,ລາວ-ຈີນຄົບຮອບ60ປີ.

ສປ ຈີນຕີລາຄາສູງ ແລະເຫັນວ່າພັກ ແລະລັດຖະບານລາວໄດ້ນຳໃຊ້ມາດຕະການທຸກອັນທີ່ທັນການ ແລະເດັດຂາດ. ໃນປັດຈຸບັນເນື່ອງຈາກປະຊາຊົນລາວກຳລັງສູ້ຊົນຕ້ານກັບການລະບາດຂອງພະຍາດໂຄວິດ-19 ໃນຮອບໃຫມ່ທີ່ມີທ່າອ່ຽງຮ້າຍແຮງ ລະບາດໄວ ຕອບໂຕ້ຍາກ ແລະມີຜົນກະທົບກວ້າງຂວາງ. ສອງຝ່າຍຍັງໄດ້ຕົກລົງໂຈະການສະເຫລີມສະຫລອງການພົວພັນການທູດຄົບຮອບ 60 ປີທີ່ວາງໄວ້ຕາມແຜນ.

ພ້ອມດຽວກັນ, ທ່ານທູດຍັງໄດ້ຕາງໜ້າໃຫ້ພັກ, ລັດ ແລະປະຊາຊົນຈີນ ສະແດງຄວາມຂອບອົກຂອບໃຈຢ່າງສຸດອົກສຸດໃຈມາຍັງຝ່າຍລາວ ທີ່ໄດ້ຮີບຮ້ອນຈັດຕັ້ງແຜນສັກຢາວັກຊິນບໍ່ເສຍຄ່າ ໃຫ້ແກ່ພົນລະເມືອງຈີນທີ່ດຳລົງຊີວິດຢູ່ລາວ ຊຶ່ງໄດ້ສະແດງໃຫ້ເຫັນເຖິງນໍ້າໃຈທີ່ເປັນຄູ່ຮ່ວມຊາຕາກຳລະຫວ່າງຈີນ-ລາວ ແລະກໍ່ເປັນການປະກອບສ່ວນອັນເປັນຮູບປະທຳໃຫ້ແກ່ການສ້າງປະຊາຄົມຮ່ວມສາທາລະນະສຸກຂອງມວນມະນຸດ.

ຈີນຍັງເຊື່ອຫມັ້ນວ່າດ້ວຍການນຳພາອັນຫນັກແຫນ້ນເຂັ້ມແຂງຂອງພັກ-ລັດ ທ່າແຮງອັນພົ້ນເດັ່ນຂອງລະບອບສັງຄົມນິຍົມ ແລະຄວາມສາມັກຄີເປັນຈິດຫນຶ່ງໃຈດຽວ ຂອງປະຊາຊົນລາວອ້າຍນ້ອງ ຈະສາມາດຜ່ານຜ່າຄວາມຫຍຸ້ງຍາກທຸກປະການໄດ້ຢ່າງແນ່ນອນ ແລະມີອະນາຄົດທີ່ສົດໃສ.

ຈີນລໍຄອຍການພົບປະສັງສັນຮ່ວມກັນ ສະເຫລີມສະຫລອງການສ້າງຕັ້ງສາຍພົວພັນການທູດຈີນ-ລາວຄົບຮອບ 60ປີ ແລະປີມິດຕະພາບຈີນ-ລາວ2021 ເພື່ອອວຍພອນໃຫ້ມິດຕະພາບລະຫວ່າງຈີນ-ລາວຈົ່ງຫມັ້ນຄົງຂະໜົງງແກ່ນ.

ຂ່າວ: ສອນປະເສີດ CRI Lao

ພາບ: AeroLAOS