ບຸນຊ່ວງເຮືອຢູ່ນະຄອນຫລວງພະບາງປີນີ້ ຈະຈັດພຽງເປັນຮີດ ຄອງປະເພນີ ເພື່ອປ້ອງກັນການລະບາດ ພະຍາດໂຄວິດ-19

ເພື່ອຮັບປະກັນບໍ່ໃຫ້ເກີດ ການລະບາດຂອງ ພະຍາດໂຄວິດ-19 ອົງການປົກຄອງແຂວງ ໄດ້ຜັນຂະຫຍາຍແຈ້ງການ ຂອງຫ້ອງວ່າການສຳນັກງານ ນາຍົກລັດຖະມົນຕີ ແລະ ຄຳສັ່ງຂອງທ່ານນາຍົກລັດຖະມົນຕີ, ໂດຍໄດ້ງົດການຈັດງານ ທີ່ຈະມີມວນຊົນເຂົ້າຮ່ວມ ເປັນຈຳນວນຫລາຍ, ສ່ວນງານບຸນປະເພນີ ທີ່ສືບທອດກັນມາຫລາຍເຊັ່ນຄົນ ແມ່ນໃຫ້ຈັດ ຕາມຮີດຄອງປະເພນີ.

ທ່ານ ຈັນສຸກ ພັນໂດລັກ ເຈົ້ານະຄອນ ຫລວງພະບາງ ໄດ້ໃຫ້ສຳພາດບໍ່ນານມານີ້ວ່າ: ສະເພາະ ບຸນຫໍ່ເຂົ້າປະດັບດີນປີນີ້ ແມ່ນຈະຈັດພຽງເປັນ ຮີດຄອງປະເພນີ ເພື່ອບໍ່ລະຮີດໃຫ້ໝອງ ບໍ່ລະຄອງໃຫ້ເສົ້າ ໃນນັ້ນແມ່ນ ຈະໂຈະງານໂລະລາດ ຫລື ລົງຕະຫລາດນັດ ແບບມວນຊົນ, ເຊິ່ງປີນີ້ແມ່ນກົງກັບວັນທີ 17 ສີງຫາ, ສ່ວນງານບຸນຊ່ວງເຮືອ ເພື່ອບູຊາແມ່ນ້ຳ ແລະ ສາຍນ້ຳບ່ອນສັກສິດ ແມ່ນຈະຈັດພິທີທາງສາສະໜາ ແລະ ຈັດແຂ່ງເຮືອ 1-2 ລ່ອງ ໂດຍປຸກລະດົມ ບັນດາບ້ານພາຍໃນນະຄອນ ທີ່ມີເຮືອຊ່ວງ ໃຫ້ເອົາເຮືອລົງ ພາຍຕາມປະເພນີ. ໃນນັ້ນປະກອບມີ ທ່ານໍ້າ ບ້ານຫາດຮ່ຽນ ໃນວັນທີ 12 ສງຫາ, ທ່ານໍ້າບ້ານສັງຄະໂລກ ວັນທີ 16 ສງຫາ ແລະ ນໍ້າຄານໃນວັນທີ 18 ສິງຫາ, ສະ ເພາະຢູູ່ນ້ຳຄານ ຈະມີເຮືອ ນາງດຳ-ນາງດ່ອນ ແລະ ເຮືອບັນດາບ້ານ ເຂົ້າຮ່ວມປະມານ 3 ຄູ່, ເພື່ອບໍ່ໃຫ້ມວນຊົນເຂົ້າຮ່ວມຫລາຍ. ພ້ອມນີ້, ຈະໄດ້ຈັດພິທີຄອບສະຖານທີ່ ສັກສິດອີກຫລາຍແຫ່ງ.

ໂອກາດນີ້, ເຈົ້ານະຄອນຫລວງພະບາງ ໄດ້ຮຽກຮ້ອງໃຫ້ປະຊາຊົນ ພາຍໃນນະຄອນຫລວງພະບາງ ຈົ່ງພ້ອມກັນປະຕິບັດ ຮີດຄອງປະເພນີໃຫ້ຄົບ ໃນໂອກາດບຸນຫໍ່ເຂົ້າປະດັບດິນ ກໍ່ຄືບຸນຊ່ວງເຮືອເດືອນ 9 ທີ່ນະຄອນຫລວງພະບາງ ໃນປີນີ້ ເພື່ອໃຫ້ບຸນປະເພນີອັນດັ່ງເດີມ ໄດ້ຮັບການສືບທອດຕໍ່ໄປ.

ເນື້ອໃນ: ຂປລ