ດຣ ຣັດຕະນະໄຊ ເພັດສຸວັນ ຫົວກົມຄວບຄຸມພະຍາດຕິດຕໍ່ ກ່າວໃນພິທີຖະແຫຼງຂ່າວວັນທີ 22 ພະຈິກ 2021 ວ່າ: ທ່າອຽງຂອງການລະບາດໂຄວິດ-19 ຢູ່ ສປປ ລາວ ກໍ່ຍັງໜ້າເປັນຫ່ວງເພາະມີໂຕເລກລາຍງານຜູ້ຕິດເຊື້ອໃໝ່ ສະເລ່ຍ 900 ກ່ວາຄົນໃນແຕ່ລະວັນ ແລະ ອັດຕາການພົບເຊື້ອກໍ່ຍັງສູງກ່ວາ 5% (ປັດຈຸບັນ 20,74% ທົ່ວປະເທດ, ນະຄອນຫຼວງວຽງຈັນ ອັດຕາການພົບເຊື້ອສູງກວ່າ 30% ລວມທັງຫຼາຍໆແຂວງທີ່ກຳລັງປະເຊີນໜ້າການລະບາດ ເຊິ່ງກຸ່ມຄົນທີ່ຕິດເຊື້ອ ພົ້ນເດັ່ນມາຫຼາຍອາທິດ ຍັງແມ່ນ ສະມາຊິກໃນຄອບຄົວຂອງຜູ້ຕິດເຊື້ອ, ຄູອາຈານ-ນັກຮຽນ-ນັກສຶກສາ, ສະຖານທີ່ຄຸມຂັງ, ພະນັກງານດ່ານໜ້າ, ພະນັກງານທະນາຄານ ກໍ່ຄືຈາກສຳນັກງານ-ອົງການອື່ນໆ ເຊິ່ງສາເຫດຂອງການຕິດເຊື້ອກໍ່ຍັງແມ່ນການບໍ່ສາມາດຮັກສາຕາມມາດຕະການທີ່ຄະນະສະເພາະກິດໄດ້ວາງອອກ.
ເນື່ອງຈາກການຢູ່ຮ່ວມກັນຫຼາຍຄົນບໍ່ວ່າໃນຄອບຄົວ ຫຼື ສະຖານທີ່ເຮັດວຽກ, ການຈັດງານປະຊຸມທາງການປະເພນີ, ເປັນຕົ້ນແມ່ນງານດອງ, ງານອອກກຳ, ເຮືອນບຸນ ແລະ ເຮືອນດີ, ງານສົ່ງສະການ ເຊິ່ງຍາກທີ່ຈະປະຕິບັດຕໍ່ມາດຕະການຮັກສາໄລຍະຫ່າງ, ໃສ່ຜ້າປິດປາກ-ດັງ ແລະ ການລ້າງມື ລວມທັງຍັງມີຄົນທີ່ມີຄວາມສ່ຽງເຂົ້າຮ່ວມງານດັ່ງກ່າວ.
ເພື່ອຄວບຄຸມ ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ-19 ຂໍຮຽກຮ້ອງໃຫ້ປະຊາຊົນ, ພະນັກງານ ທະຫານ ຕຳຫຼວດ ແລະ ທຸກພາກສ່ວນໃນສັງຄົມໃຫ້ມີຄວາມຕື່ນຕົວ ແລະ ສືບຕໍ່ປະຕິບັດແຈ້ງການເລກທີ 1494/ຫສນຍ ລົງວັນທີ 14 ພະຈິກ 2021 ຢ່າງເຂັ້ມງວດ.
Discussion about this post