ຈະລາຈອນ 3 ເມືອງ ສຸ່ມໃສ່ຕັ້ງດ່ານກວດກາເພີ່ມມາດຕະການປ້ອງກັນການແຜ່ລະບາດໂຄວິດ

ຈະລາຈອນ 3 ເມືອງ ສຸ່ມໃສ່ຕັ້ງດ່ານກວດກາການປະຕິບັດມາດຕະການຄວບຄຸມການແຜ່ລະບາດ ແລະ ປະຕິບັດມາດຕະການປ້ອງກັນການແຜ່ລະບາດ

ໂດຍປະຕິບັດຕາມແຈ້ງການເລກທີ 1402/ຫສນຍ ແລະ ແຈ້ງການເລກທີ 41/ຈນວ ລົງວັນທີ່ 5 ພະຈິກ 2021 ວ່າດ້ວຍການຈັດຕັ້ງຜັນຂະຫຍາຍ ບັນດາມາດຕະການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດໂຄວິດ-19 ຢູ່ນະຄອນຫຼວງວຽງຈັນ ໃນວັນທີ 09 ພະຈິກ 2021 ເຈົ້າໜ້າທີ່ກອງຮ້ອຍຈະລາຈອນ ເມືອງໄຊເສດຖາ, ເມືອງຈັນທະບູລີ ແລະ ເມືອງຫາດຊາຍຟອງ ໄດ້ລົງຕັ້ງດ່ານກວດກາພາຫະນະສັນຈອນໄປ-ມາ ໃນພື້ນທີ່ຄວາມຮັບຜິດຊອບ ເພື່ອກວດກາການປະຕິບັດມາດຕະການ ແລະ ຄວາມເປັນລະບຽບຮຽບຮ້ອຍຕາມທ້ອງຖະໜົນ ໃນໄລຍະການແຜ່ລະບາດຂອງພະຍາດ

ການຕັ້ງດ່ານກວດກາ ແມ່ນເນັ້ນການເຕືອນສະຕິນັກຂັບຂີ່ຜູ້ໃຊ້ລົດ-ໃຊ້ຖະໜົນ ໃຫ້ຮັບຮູ້, ເຂົ້າໃຈກົດລະບຽບການສັນຈອນ ແລະ ເພີ່ມທະວີປະຕິບັດຕາມຄໍາສັ່ງ, ແຈ້ງການ ຂອງຂັ້ນເທີງວາງອອກຢ່າງເຂັ້ມງວດ ເພື່ອປ້ອງກັນ, ຄວບຄຸມ ບໍ່ໃຫ້ພະຍາດໂຄວິດ-19 ແຜ່ລະບາດອອກສູ້ວົງກວ້າງ.

ກອງບັນຊາການ ປກສ ນວ ຮຽກຮ້ອງນັກຂັບຂີ່ຜູ້ໃຊ້ລົດ-ໃຊ້ຖະໜົນ ເອົາໃຈໃສ່ປະຕິບັດກົດລະບຽບຈະລາຈອນ ໃປຄຽງຄູ່ກັບການປະຕິບັດຕາມຄໍາສັ່ງ, ແຈ້ງການຂອງຄະນະສະເພາະກິດວາງອອກ ຖ້າບໍ່ມີຄວາມຈໍາເປັນກໍໃຫ້ຢູ່ບ້ານ ເພື່ອຕ້ານການແຜ່ລະບາດ ແລະ ປ້ອງກັນການເກີດອຸບັດຕິເຫດ.

ທີ່ມາ:ປ້ອງກັນຄວາມສະຫງົບນະຄອນຫຼວງວຽງຈັນ