ປກສ ນະຄອນຫຼວງວຽງຈັນທໍາລາຍຢາເສບຕິດ 378 ກວ່າກິໂລກຼາມ

ວັນທີ 30 ຕຸລາ ນີ້,ກອງບັນຊາການ ປກສ ນະ ຄອນຫຼວງວຽງຈັນ ໄດ້ຈັດພິທີຈູດທໍາລາຍຢາເສບ ຕິດ ທີ່ສານໄດ້ຕັດສິນແລ້ວ,ໂດຍມີ ພົຕ ທອງເຫຼັກ ມັງໜໍ່ເມກ ຮອງລັດຖະມົນຕີ ກະຊວງປ້ອງກັນຄວາມສະຫງົບ.

ພ້ອມດ້ວຍ, ພົຈວ ສີພອນ ຈັນສົມວົງ ຫົວໜ້າການເມືອງ ກອງບັນຊາການທະຫານ ນວ, ມີການນໍາ ກະຊວງປ້ອງກັນຄວາມສະຫງົບ ແລະ ພາກສ່ວນທີ່ກ່ຽວເຂົ້າຮ່ວມ.

ໃນພິທີ,ພັອ ພູພອນ ວົງພະໄຕ ຮອງຫົວໜ້າກອງບັນຊາການ ປກສ ນວ ໃຫ້ຮູ້ວ່າ: ການທໍາລາຍຢາເສບຕິດຄັ້ງນີ້ ເພື່ອສະເຫຼີມສະຫຼອງວັນແຫ່ງຊາດຕ້ານຢາເສບຕິດ (12 ຕຸລາ 2001-12 ຕຸລາ 2021) ຄົບຮອບ 20 ປີ, ພ້ອມທັງ ເປັນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຢາເສບຕິດ ຮອດປີ 2023.

ນອກຈາກນີ້, ກໍເພື່ອທໍາລາຍຢາເສບຕິດໃຫ້ໝົດໄປຈາກສັງຄົມ,ສໍາລັບຢາເສບຕິດ ທີ່ນໍາມາທໍາລາຍໃນຄັ້ງນີ້ ແມ່ນໄດ້ມາຈາກກົມຕໍາຫຼວດສະກັດກັ້ນ ແລະ ຕ້ານຢາເສບຕິດ ກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ.

ແລະ ຈາກພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ນວ ລວມມີ ຢາບ້າ 69,25 ກິໂລກຼາມ, ຢາໄອສ໌ 110,75 ກິໂລກຼາມ, ເຮໂຣອີນ 6,5 ກິໂລກຼາມ, ກັນຊາແຫ້ງ 192 ກິໂລກຼາມ ແລະ ໂຄເຄນ 125 ກຼາມ.

ຂ່າວ-ພາບ: ປກສ ນະຄອນຫຼວງວຽງຈັນ