ສຶກສາອົບຮົມ ຊາຍ 2 ຄົນ ເມົາແລ້ວອາລະວາດຕີກັນ

ໃນເວລາ 22:30 ໂມງຂອງວັນທີ 15 ຕຸລາ 2021, ເຈົ້າໜ້າທີ່ ປກສ ກຸ່ມເພຍວັດ ໄດ້ຮັບແຈ້ງຄວາມ ຈາກພົນລະເມືອງດີວ່າ: ມີຄົນກິນເຫຼົ້າເມົາແລ້ວອາລະວາດຕີກັນ ຢູ່ໂຮງແຮມແກຣນ ວຽງຈັນ ເຊິ່ງຕັ້ງຢູ່ບ້ານດົງປາລານທົ່ງ ໜ່ວຍ 15 ເມືອງສີສັດຕະນາກ ນວ ດັ່ງນັ້ນ, ເຈົ້້າໜ້າທີ່ ໜ່ວຍງານຄຸ້ມຄອງຄົນຕ່າງປະເທດ ພະແນກສັນຕິບານ ປກສ ເມືອງສີສັດຕະນາກ ໄດ້ສົມທົບກັບ ປກສ ກຸ່ມເພຍວັດ ແລະ ອໍານາດການປົກຄອງບ້ານດົງປາລານທົ່ງ ເມືອງສີສັດຕະນາກ ນະຄອນຫຼວງວຽງຈັນ ລົງກວດກາຕົວຈິງພົບເຫັນຊາຍ 2 ຄົນ, ສັນຊາດເກົາຫຼີໃຕ້ຄື: ທ້າວ ກິມຂົງຢໍ ອາຍຸ 55 ປີ ອາຊີບ ນັກທຸລະກິດ ພັກເຊົາຢູ່ບ້ານທ່າພະລານໄຊ ເມືອງສີສັດຕະນາກ ນວ ແລະ ທ້າວ ຊົງເຮຢຸ່ ອາຍຸ 52 ປີ ອາຊີບນັກທຸລະກິດ ພັກເຊົາຢູ່ໂຮງແຮມແກຣນ ວຽງຈັນ ຈິ່ງໄດ້ເຊີນຂຶ້ນມາຫ້ອງການ ເພື່ອເຮັດບົດບັນທຶກ ແລະ ສຶກສາອົບຮົມກ່າວເຕືອນ ພ້ອມທັງບອກໃຫ້ຢຸດເຊົາຕໍ່ພຶດຕິກໍາດັ່ງກ່າວ.ກອງບັນຊາການ ປ້ອງກັນຄວາມສະຫງົບ ນະຄອນຫຼວງວຽງຈັນ ຮຽກຮ້ອງມາຍັງເຈົ້າຂອງກິດຈະການ, ຫົວໜ່ວຍທຸລະກິດຕ່າງໆ ໃຫ້ເປັນເຈົ້າການໃນການປ້ອງກັນ, ສະກັດກັ້ນ, ການແຜ່ລະບາດຂອງພະຍາດໂຄວິດ -19 ຢ່າງເຂັ້ມງວດ. ຖ້າເມີນເສີຍ ປ່ອຍໃຫ້ເຄຫະສະຖານຂອງຕົນ ເປັນບ່ອນຊຸມແຊວເຫຼົ້າເບຍ ທີ່ເປັນສາເຫດເຮັດໃຫ້ການແຜ່ລະບາດຂອງເຊື້ອພະຍາດ -19 ຂະຫຍາຍອອກເປັນວົງກ້ວາງ. ຖ້າມີຂໍ້ມູນ ຫຼື ເຈົ້າໜ້າທີ່ກວດພົບດ້ວຍຕົນເອງ ຈະປະຕິບັດຕາມກົດໝາຍຢ່າງເຂັ້ມງວດ ຮຽກຮ້ອງສັງຄົມ ຖ້າພົບເຫັນການລະເມີດແມ່ນໃຫ້ລາຍງານມາທາງເບີວອດແອັບ ປກສ ນວ02028899774 ຕະຫຼອດ 24 ຊົ່ວໂມງ ຫຼື ຜ່ານທາງເຟັສບຸກ ປ້ອງກັນຄວາມສະຫງົບ ນະຄອນຫຼວງວຽງຈັນ.