ແຂວງບໍ່ແກ້ວ ຈູດທຳລາຍຢາ, ສານເສບຕິດ ລວມຫຼາຍພັນກິໂລ

ວັນທີ 15 ຕຸລາ ຜ່ານມານີ້, ແຂວງບໍ່ແກ້ວ ຈັດພິທີຈູດທຳລາຍຢາເສບຕິດ ແລະ ສານເສບຕິດ ລວມຫຼາຍພັນກິໂລ,ເນື່ອງໃນວັນແຫ່ງຊາດຕ້ານຢາເສບຕິດ ຄົບຮອບ 20 ປີ,ໂດຍມີ ທ່ານ ຄຳຜະຫຍາ ພົມປັນຍາ ຮອງເຈົ້າແຂວງບໍ່ແກ້ວ ປະທານຄະນະກຳມະການກວດກາ ແລະ ຄວບຄຸມຢາເສບຕິດ ຂັ້ນແຂວງ,ພ້ອມດ້ວຍ ການນຳຂັ້ນແຂວງ-ເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ພັທ ຈັນພອນເພັດ ຄຳສີ ຮອງຫົວໜ້າກອງບັນຊາການ ປກສ ແຂວງບໍ່ແກ້ວ ໄດ້ກ່າວໃນພິທີວ່າ: ຢາເສບຕິດ ແລະ ສານເສບຕິດ ທີ່ນຳມາຈູດທຳທາຍໃນຄັ້ງນີ້ ແມ່ນຂອງກາງຄະດີຢາເສບຕິດ ທີ່ສານປະຊາຊົນແຂວງ ໄດ້ຕັດສີນຄະດີສິ້ນສຸດແລ້ວ ແລະ ມີຂໍ້ຕົກລົງໃຫ້ທຳລາຍຖີ້ມ ລວມມີ: ຢາບ້າ 13.624.983 ເມັດ ໜັກ 1.362 ກິໂລກຼາມ.

ຢາໄອສ໌ 534 ຖົງ ໜັກ 534 ກິໂລ, ເຮໂຣອິນ 156 ແຫ່ງ ໜັກ 60 ກິໂລ, ແປ້ງຝຸ່ນ ສານເສບຕິດ 158 ເປົ້າ ໜັກ 3.950 ກິໂລ, ໂຄເຄນ 2 ຖົງນ້ອຍ ໜັກ 0,44 ກຼາມ,ກັນຊາແຫ້ງ 1 ຖົງນ້ອຍ ໜັກ 8,6 ກຼາມ, ເຟຕາມີນ 44 ເມັດ ໜັກ 13,2 ກຼາມ ແລະ ຢາອີ 2 ຖົງນ້ອຍ ໜັກ 2,619 ກຼາມ.

ທ່ານຮອງຫົວໜ້າກອງບັນຊາການ ປກສ ແຂວງບໍ່ແກ້ວ ຍັງໃຫ້ຮູ້ຕື່ມອີກວ່າ: ໃນ 1 ປີ ຜ່ານມາ,ແຂວງບໍ່ແກ້ວ ມ້າງຄະດີຢາເສບຕິດ ໄດ້ 338 ເລື່ອງ, ຈັບຜູ້ຖືກຫາ 393 ຄົນ,ຍິງ 35 ຄົນ.ໃນນີ້,ມີຄົນຕ່າງປະເທດ 67 ຄົນ, ຢຶດຢາເສບຕິດປະເພດຕ່າງໆ ຄື: ຢາບ້າຈຳນວນ 23.151.807 ເມັດ ໜັກ 2.315 ກິໂລກຼາມ.

ຢາໄອສ໌ 866 ກິໂລ,ເຮໂຣອິນ 156 ແທ່ງ ໜັກ 60 ກິໂລ,ແປ້ງຝຸ່່ນສານເສບຕິດ 16.250 ກິໂລ,ປືນສັ້ນ 3 ກະບອກ ພ້ອມລູກປືນ 22 ລູກ,ລົດໃຫຍ່ 11 ຄົນ,ລົດຈັກ 25 ຄັນ ແລະເຄື່ອງຂອງກາງອື່ນໆອີກຫຼາຍລາຍການ.

ນອກຈາກນີ້,ຍັງໄດ້ທຳລາຍສວນຝິ່ນ ລວມມີເນື້ອທີ່ 24 ເຮັກຕາ ແລະ ລົງໂຄສະນາເຜີຍແຜ່ຜົນຮ້າຍໄພອັນຕະລາຍຂອງຢາເສບຕິດ ໃນຊຸມຊົນຕ່າງໆ ລວມມີຜູ້ເຂົ້າຮ່ວມຮັບຟັງ 1.559 ຄົນ.

ພ້ອມກັນນີ້,ໄດ້ນຳສົ່ງຜູ້ເສບຢາເສບຕິດ ເຂົ້າບຳບັດປິ່ນປົວ ແລະ ຟື້ນຟູສຸຂະພາບ ໃນສູນບໍາບັດນໍ້າຈ້ວມ ຈຳນວນ 155 ຄົນ,ຍິງ 6 ຄົນ.