ຖືກຈັບ ຍ້ອນຊື້ລົດເຖື່ອນຍັງກວດຄົ້ນເຫັນຢາບ້າ 965 ເມັດ

ວັນທີ 11 ຕຸລາ ຜ່ານມາ,ປກສ ເມືອງສີໂຄດຕະບອງ ໄດ້ສົມທົບກັບ ປກສ ກຸ່ມນາຝາຍ ເມືອງປາກງື່ມ ນວ ເຂົ້າຈັບທ້າວ ສະຫຼັກຈິດ ຫຼື ຕ້າ ຢູ່່ບ້ານໜອງບົວທອງ ເມືອງປາກງື່ມ ໃນຂໍ້ຫາຊື້-ຂາຍຊັບຜິດກົດໝາຍ(ຊື້ລົດເຖື່ອນ)ແລະ ຍັງກວດຄົ້ນເຫັນຢາບ້າ ນໍາຜູ້ກ່ຽວ 965 ເມັດ.

ປກສ ເມືອງສີໂຄດຕະບອງ ໃຫ້ຮູ້ວ່າ: ຄະດີດັ່ງກ່າວນີ້ ແມ່ນສືບເນື່ອງມາຈາກ ການຊັດທອດຂອງຜູ້ຖືກຫາ ຄະດີລັກຊັບພົນລະເມືອງ(ລັກລົດ) ທີ່ເຈົ້າໜ້າທີ່ ປກສ ເມືອງສີໂຄດຕະບອງ ມ້າງໄດ້ກ່ອນໜ້ານີ້ ໃນວັນທີ 8 ກັນຍາ ຜ່ານມາ.ເຊິ່ງຜູ້ຖືກຫາຄະດີດັ່ງກ່າວ ໄດ້ເອົາລົດຈັກເວບໄອ 110 ສີດໍາ ທີ່ລັກມານັ້ນ ໄປຂາຍໃຫ້ທ້າວ ສະຫຼັກຈິດ ໃນລາຄາ 9.000 ບາດ ໃນວັນທີ 30 ສິງຫາ 2021.

ຜ່ານການສອບສວນ ທ້າວ ສະຫຼັກຈິດ ສາລະພາບວ່າ:ໄດ້ຊື້ລົດຈັກຄັນດັ່ງກ່າວນຳທ້າວ ໄຊ ອາຍຸ 34 ປີ (ຜູ້ຖືກຫາຄະດີລັກຊັບ)ພັກເຊົາຢູ່່ບ້ານດົງກະເລົາ ເມືອງສີໂຄດຕະບອງ ນວ ໃນລາຄາ 9.000 ບາດ,ສ່ວນຢາບ້າ ຈຳນວນ 965 ເມັດ ທີ່ເຈົ້າໜ້າທີ່ກວດພົບນັ້ນ ແມ່ນໄດ້ຕິດ ຕໍ່ສັ່ງຊື້ນຳໄວລຸ້ນ ຢູ່່ບ້ານໜອງບຶກ ເມືອງສີໂຄດຕະບອງ,ໂດຍນັດສົ່ງຢາບ້າໃຫ້ກັນຢູ່່ເສັ້ນທາງ ເຂດບ້ານທາງໂຄ້ງ ເມືອງປາກງື່ມ ເພື່ອຈະເອົາໄປຂາຍ.

ປັດຈຸບັນຄະດີດັ່ງກ່າວ,ເຈົ້າໜ້ທີ່ ປກສ ເມືອງສີໂຄດຕະບອງ ນວ ພວມດໍາເນີນຕາມຂັ້ນຕອນຂອງກົດໝາຍ.

ຂໍ້ມູນຂ່າວ-ພາບ: ປກສ ນະຄອນຫຼວງວຽງຈັນ