ເຈົ້າໜ້າທີ່!…ກັກຕົວຊາຍຕ່າງຊາດພົບເຫັນຢາບ້າ 200 ເມັດ,ປືນສັ້ນ1ກະບອກ

ວັນທີ 9 ຕຸລາ ຜ່ານມາ, ເວລາປະມານ 00:20 ໂມງ ເຈົ້າໜ້າທີ່ປະຈຳການ ຈຸດກວດກາຢູ່່ເສັ້ນທາງ ເຂດສວນເຈົ້າຟ້າງຸ່ມ ເມືອງສີໂຄດຕະ ບອງ ນວ ໄດ້ຕິດຕາມກັກຕົວຜູ້ຂັບຂີ່ລົດຈັກ ທີ່ລົບຫຼີກຈຸດກວດກາ ແລ້ວລົດຄັນດັ່ງກ່າວເສຍຫຼັກລົ້ມ ກໍຖືກກັກຕົວ.

ພ້ອມກວດຄົ້ນຖົງພາຍສີດໍາ ພົບເຫັນຢາບ້າ 200 ເມັດ,ຢາໄອສ໌ 1 ຖົງນ້ອຍ,ອຸປະກອນເສບຢາ 4 ອັນ ແລະ ປືນສັ້ນ 9 ມມ ພ້ອມລູກ ປືນ 12 ລູກ ຈຶ່ງໄດ້ນໍາສົ່ງຜູ້ກ່ຽວພ້ອມຂອງກາງ ໃຫ້ກອງບັນຊາການ ປກສ ເມືອງສີໂຄດຕະບອງ ດໍາເນີນຄະດີ.

ເຈົ້າໜ້າທີ່ ປກສ ເມືອງສີໂຄດຕະບອງ ໃຫ້ຮູ້ວ່າ:ຜູ້ຖືກຫາ ຊື່ ທ້າວ ໂຈຮອຍໂຢ ອາຍຸ 43 ປີ ສັນຊາດມາເລເຊຍ ພັກເຊົາຢູ່່ບ້ານດອນນົກຂຸ້ມ ເມືອງສີສັດຕະນາກ ນວ.ຈາກການສອບສວນໃນເບື້ອງຕົ້ນ ຜູ້ກ່ຽວສາລະພາບວ່າ: ວັນທີ 9 ຕຸລາ ໄດ້ໂທລະສັບສັ່ງຊື້ຢາບ້າ ຈໍານວນ 200 ເມັດ,ໂດຍນັດຈຸດສົ່ງຢາບ້າໃຫ້ກັນ ຢູ່່ໂຮງແຮມແຫ່ງໜຶ່ງ ເຂດບ້ານດົງນາໂຊກ ເມືອງສີໂຄດຕະບອງ ນວ.

ສ່ວນຢາໄອສ໌ ແມ່ນຊື້ ນໍາຊາຍຄົນຕ່າງປະເທດ(ບໍ່ຮູ້ຊື່) ຢູ່່ໂຮງແຮມແຫ່ງໜຶ່ງ ເຂດບ້ານມີໄຊ ເມືອງຈັນທະບູລີ ນວ, ສ່ວນປືນສັ້ນ ແມ່ນຂອງຄົນທີ່ຕິດໜີ້ ແລ້ວບໍ່ມີເງິນໃຊ້ແທນ ຈຶ່ງຢຶດເອົາປືນໄວ້.

ປັດຈຸບັນຄະດີດັ່ງກ່າວນີ້, ເຈົ້າໜ້າທີ່ກອງບັນຊາການ ປກສ ເມືອງສີໂຄດຕະບອງ ພວມປະສານຫາຫ້ອງຕໍາຫຼວດ ປກສ ນວ ເພື່ອນໍາສົ່ງຜູ້ກ່ຽວໃຫ້ຫ້ອງຕໍາຫຼວດ ສືບຕໍ່ເນີນຄະດີ.

ຂໍ້ມູນຂ່າວ-ພາບ: ປກສ ນະຄອນຫຼວງວຽງຈັນ