ປກສ ແຂວງອຸດົມໄຊ ບຸກຍຶດໄດ້ ເຄື່ອງອັດ ແລະ ຢາຫຼາຍພັນເມັດ

ເຈົ້າໜ້າທີ່ກອງບັນຊາການ ປກສ ແຂວງອຸດົມໄຊ ເປີດເຜີຍວ່າ: ພາຍຫຼັງທີ່ໄດ້ຮັບຂໍ້ມູນຈາກພົນລະເມືອງດີ ໃນຕົ້ນເດືອນກັນຍາ ທີ່ຜ່ານມາວ່າ ຢູ່່ດິນສວນໃກ້ກັບເຮືອນຂອງ ທ້າວ ຈູໄລວ້າ ບ້ານພູສະຫວັນ ເມືອງໄຊ ມີຮ່ອງຮອຍສົງໄສພົວພັນຢາເສບຕິດ ຈຶ່ງໄດ້ແຕ່ງຕັ້ງພະນັກງານວິຊາສະເພາະລົງກວດກາ ແລະ ຕິດຕາມ ເຫັນວ່າ ມີມູນຄວາມຈິງ ແລະ ສາມາດເຊື່ອຖືໄດ້ ກ່ອນນໍາກໍາລັງເຂົ້າກວດຄົ້ນເຄຫະສະຖານ (ເຮືອນສົງໄສ) ແລະ ຈັບກຸມເປົ້າໝາຍ 2 ຄົນ ໃນວັນທີ 25 ກັນຍາ 2021.

ຜ່ານການສອບສວນໃນເບື້ອງຕົ້ນ ຍັງສາມາດຂະຫຍາຍຜົນເຖິງພັກພວກຮ່ວມຂະບວນ ອີກ 2 ຄົນ ລວມເປັນ 4 ຄົນ ຊື່ ທ້າວ ຈຸໄລວ້າ ອາ ຍຸ 48 ປີ, ທ້າວ ປໍຈົວລີ ອາຍຸ 29 ປີ, ທ້າວ ຊົວເຈີລີ ອາຍຸ 58 ປີ ແລະ ທ້າວ ວົງລີ ອາຍຸ 19 ປີ ພວກກ່ຽວຢູ່່ບ້ານພູສະຫວັນ. ສໍາລັບການກວດຄົ້ນເຄຫະສະຖານ ທີ່ພົວພັນກັບຢາເສບຕິດຄັ້ງນີ້, ມີທັງໝົດ 3 ຈຸດ ຄື:

ຈຸດທີ 1: ແມ່ນເຮືອນຂອງ ທ້າວ ຈູໄລວ້າ ສາມາດຢຶດເຄື່ອງຂອງກາງໄດ້ ຄື ຢາບ້າ ຈໍານວນ 265 ເມັດ, ບັ້ງເສບຢາບ້າ 1 ບັ້ງ, ເງິນ 2.000.000 ກີບ, ລົດຈັກ 1 ຄັນ ແລະ ໂທລະສັບ ມືຖື 2 ເຄື່ອງ.

ຈຸດທີ 2: ເຮືອນຂອງ ທ້າວ ປໍຈົວລີ, ທ້າວ ຊົວເຈີລີ ແລະ ທ້າວ ວົງລີ ( ທັງ 3 ແມ່ນຄົນໃນຄອບຄົວດຽວກັນ) ກວດພົບເຫັນ ຢາບ້າ ຈໍານວນ 194 ເມັດ, ເງິນ 25.000 ບາດ, ປືນລົມ 1 ກະບອກ, ລົດຈັກ 2 ຄັນ, ໂທລະສັບມືຖື 2 ເຄື່ອງ ແລະ ລົດເກັງ ຍີ່ຫໍ້ HYUNDAI ສີປອນເງິນ ທະ ບຽນ ກທ 6448 ກໍາແພງນະຄອນ.

ຈຸດທີ 3: ກວດຄົ້ນຫ້ອງໃຕ້ດິນ ຢູ່່ສວນຂອງ ທ້າວ ຈຸໄລວ້າ ແລະ ທ້າວ ປໍຈົວລີ ພົບເຫັນຢາບ້າ ເມັດສີແດງ ຈໍານວນ 8.790 ເມັດ, ຢາບ້າທີ່ຍັງເປັນແປ້ງຝຸ່່ນສີແດງ (ບໍ່ທັນໄດ້ອັດເປັນເມັດ) 1 ຖົງ ນ້ໍາໜັກ 5 ກິໂລກຼາມ, ຢາບ້າ ເປັນເມັດສີຂຽວ 4.170 ເມັດ, ແປ້ງຝຸ່ນປະສົມນ້ໍາໜັກ 12,8 ກິໂລກຼາມ, ຫົວຕອກກາຈ້ໍາ ມີເຄື່ອງໝາຍໂຕ Y ຈຳນວນ1 ອັນ, ເຄື່ອງໝາຍໂຕ A ຈຳນວນ1 ອັນ ແລະ ເຄື່ອງໝາຍເລກ 1 ຈໍານວນ 1 ອັນ ແລະ ອຸປະກອນອື່ນໆທີ່ກ່ຽວຂ້ອງຈໍານວນໜຶ່ງ.

ຜ່ານການສອບສວນ ທ້າວ ຈູໄລວ້າ ແລະ ທ້າວ ປໍຈົວລີ ຮັບສະພາບວ່າ: ໄດ້ຮ່ວມກັນເຄື່ອນໄຫວພົວພັນຢາເສບຕິດເເທ້,ສ່ວນເຄື່ອງຂອງກາງຢາບ້າ, ເຄື່ອງມື -ອຸປະກອນທີ່ກ່ຽວຂ້ອງ ທີ່ເຈົ້າໜ້າທີ່ກວດພົບເຫັນ ແລະ ສາມາດຢຶດໄດ້ໃນຫ້ອງໃຕ້ດິນ ຢູ່່ສວນນັ້ນ ແມ່ນຂອງພວກກ່ຽວແທ້.

ເຊິ່ງໃນຕົ້ນເດືອນສິງຫາ 2021 ພວກກ່ຽວໄດ້ຕິດຕໍ່ສັ່ງຊື້ເຄື່ອງມື-ອຸປະກອນນໍາຜູ້ຮ່ວມຂະບວນການ (ບໍ່ຮູ້ຊື່ ແລະ ທີ່ຢູ່່) ເຊິ່ງເປັນໂຊເຟີຂັບລົດບັນທຸກ 12 ລໍ້ ໃນລາຄາ 60.000.000 ກີບ.ພາຍຫຼັງທີ່ໄດ້ເຄື່ອງມາແລ້ວ ກໍໄດ້ພາກັນຂຸດຂຸມສ້າງຫ້ອງໃຕ້ຕິດ ແລ້ວຕິດຕໍ່ສັ່ງຊື້ແປ້ງຝຸ່່ນ ແລະ ສານເຄມີ ທີ່ໃຊ້ປະສົມປຸງແຕ່ງຢາບ້າ ແລະ ພວກກ່ຽວເຮັດສໍາແລ້ວຄັ້ງທໍາອິດ ໄດ້ຢາບ້າ ຈໍານວນ 18 ມັດ.

ຈາກນັ້ນ, ກໍນໍາໄປຂາຍໃຫ້ຊາຍບໍ່ຮູ້ຊື່ (ຄົນມາແຕ່ຕ່າງແຂວງ) ໂດຍການນັດສົ່ງຊື້-ຊາຍຢາບ້າ ໃຫ້ກັນຢູ່່ເຂດບ້ານຫຼັກ 44, ສ່ວນຢາບ້າ ແລະ ແປ້ງຝຸ່່ນ ທີ່ເຈົ້າຫນ້າທີ່ຢຶດໄດ້ໃນຫ້ອງໃຕ້ດິນ ແມ່ນຈໍານວນທີ່ບໍ່ທັນໄດ້ບັນຈຸໃສ່ຖົງ ແລະ ບໍ່ທັນໄດ້ອັດເປັນເມັດເທື່ອ.

ທ້າວ ຈູໄລວ້າ ຍັງໃຫ້ການອີກວ່າ: ສໍາລັບ ຢາບ້າ ຈໍານວນ 265 ເມັດ ທີ່ກວດພົບເຫັນຢູ່່ເຮືອນຂອງຜູ້ກ່ຽວນັ້ນ ແມ່ນນໍາອອກມາຈາກຫ້ອງໃຕ້ດິນ ເພື່ອນໍາມາໄວ້ເສບເອງ. ທ້າວ ປໍຈົວລີ ໄດ້ໃຫ້ການອີກວ່າ: ຢາບ້າ ຈໍານວນ 194 ເມັດ ທີ່ຢຶດໄດ້ຢູ່່ເຮືອນຂອງຕົນນັ້ນ ແມ່ນເອົາມາໃຫ້ ທ້າວ ຊົວເຈີລີ (ພໍ່) ເສບ.

ທ້າວ ຊົວເຈີລີ ໄດ້ໃຫ້ການວ່າ: ລູກຊາຍເອົາມາໃຫ້ຜູ້ກ່ຽວເສບແທ້, ສ່ວນການເຄື່ອນໄຫວຕ່າງໆນັ້ນ ແມ່ນບໍ່ຮັບຮູ້ ແລະ ທ້າວ ວົງລີ (ນ້ອງ ຊາຍ) ຂອງທ້າວ ປໍຈົວລີ ແມ່ນໄດ້ໃຫ້ການປະຕິເສດວ່າ ບໍ່ຮັບຮູ້ ແລະ ບໍ່ກ່ຽວຂ້ອງກັບຂະບວນການໃນຄັ້ງນີ້.

ປັດຈຸບັນຄະດີດັ່ງກ່າວ, ເຈົ້າໜ້າທີ່ ປກສ ແຂວງອຸດົມໄຊ ຍັງສືບຕໍ່ສອບສວນຂະຫຍາຍຜົນຫາກຸ່ມແກ້ງພັກພວກ ທີ່ຮ່ວມຂະບວນການ ເພື່ອນໍາຕົວມາດໍາເນີນຄະດີຕາມກົດໝາຍ.

ທີ່ມາ ຂ່າວ-ພາບ: ເພຈຄວາມສະຫງົບ Lao security News